لاہور، 7 مئی ( اے پی پی ) :وزیراعلیٰ پنجاب کی طرف سے لاہور کے شہریوں کی سہولت کے لئے 17 گاڑیوں کا تحفہ،نئے ٹرک، ٹریکٹر اور دیگر گاڑیاں بلدیہ عظمیٰ لاہور کے اینٹی انکروچمنٹ سکواڈ کے سپرد کر دی گئیں ۔
ٹائون ہال لاہور میں 222 ملین روپے سے خریدی گئی گاڑیوں کو بلدیہ کے حوالے کرنے کی تقریب کا انعقاد کیا گیا ۔وزیر بلدیات ذیشان رفیق نے وزیراعلیٰ مریم نواز کی نمائندگی کرتے ہوئے گاڑیاں حوالے کیں، ڈپٹی کمشنر/ ایڈمنسٹریٹر میٹروپولیٹن کارپوریشن رافعہ حیدر نے گاڑیوں کی چابیاں وصول کیں۔ گاڑیوں میں 12 اوپن ٹرک، 2 ڈمپر ٹرک، دو ٹریکٹر ٹرالی اور ایک ایکسکویٹرشامل ہیں۔
وزیر بلدیات ذیشان رفیق نے تقریب سے خطاب کرتے ہوئے کہا کہ گزشتہ کئی برسوں سے بلدیہ عظمیٰ لاہور کے لئے کوئی نئی گاڑی نہیں خریدی گئی، گاڑیوں کی قلت کے باعث تجاوزات کے خلاف آپریشن میں مشکلات پیش آرہی تھیں۔انہوں نے کہا کہ وزیراعلیٰ نے تجاوزات کے خلاف موثر آپریشن کیلئے گاڑیاں خریدنے کی منظوری دی، لاہور کی ری ویمپنگ کا پلان بنا رہے ہیں، چند ماہ میں شہر کی حالت بدلی نظر آئے گی ،لاہور کی آبادی زیادہ ہونے کی وجہ سے مسائل بھی زیادہ ہیں، لاہور کی ہر گلی محلے میں میونسپل خدمات کی فراہمی کے لئے جامع پلان تیار کیا گیا ہے۔
ذیشان رفیق نے کہا کہ سابق تبدیلی سرکار نے چلتے ہوئے بلدیاتی نظام کو گھر بھجوا دیا تھا،سپریم کورٹ کے حکم پر بھی سابق دور میں بلدیاتی انتخابات نہیں کرائے گئے، وزیراعلیٰ مریم نواز شریف کی ہدایت پر نئی بلدیاتی قانون کی تیاری پر کام شروع کر دیا، صرف گندم نہیں کسانوں کے دیگر مسائل کے حل کے لئے بھی جامع پیکیج لایا جا رہا ہے۔
