لاہور، 30 مئی(اے پی پی): وادی سون جنگلات میں خوفناک آتشزدگی پر قابو پانے کیلئے آگ بجھانے کی کاوشیں جاری ہیں۔وزیر اعلیٰ پنجاب مریم نواز شریف نے وادی سون کے جنگلات میں خوفناک آتشزدگی کی رپورٹ طلب کر لی ہے۔
وادی سون سکیسر سے ملحقہ پہاڑی جنگل میں گزشتہ روز اچانک آگ بھڑک اٹھی،آگ کئی کلومیٹر پر پھیل گئی۔ محکمہ جنگلات کا چوکیدار آگ بجھاتے ہوئے جھلس کر جاں بحق ہو گیا،ملازم رضا شاہ کی میت کو ٹی ایچ کیو ہسپتال منتقل کر دیا گیا۔ وزیر اعلیٰ مریم نواز شریف اور سینیرصو بائی وزیر مریم اور نگزیب نے آتشزدگی کے دوران شہید ہونے والے چوکیدار سید غلام رضا کو خراج عقیدت پیش کرتے ہوئے شہید چوکیدار کےاہل خانہ سے دلی ہمدردی و اظہار تعزیت کیا۔ مریم اورنگزیب نے کہا کہ شہید چوکیدار نے اپنے فرائض کی ادائیگی میں جان قربان دی،حکومت پنجاب شہید چوکیدار کے اہل خانہ کے ساتھ ہے ۔ خوشاب ضلعی انتظامیہ کی درخواست پر آگ بجھانے کےلئے پی ڈی ایم اے کوفضائی آپریشن کی ہدایت دی گئی۔ مریم نواز نے کہا کہ وادی سون کے جنگلات قومی اثاثہ ہیں، آگ بجھانے کے لئے ممکنہ اقدامات کئے جائیں – انہوں نے کہا کہ متعلقہ ادارے وادی سون میں آتشزدگی پر مکمل طور پر قابو پانے تک الرٹ رہیں۔
