لاہور، یکم اگست(اے پی پی): وزیر اعلیٰ پنجاب مریم نواز شریف کے محفوظ پنجاب ویژن کے تحت پنجاب پولیس کا ناجائز اسلحہ کے خاتمے کیلئے سخت کریک ڈاؤن جاری۔آئی جی پنجاب کی ہدایت پر پنجاب پولیس لاہور سمیت صوبے کے تمام اضلاع کو اسلحہ سے پاک کرنے کیلئے مصروف عمل ہے۔
ترجمان پنجاب پولیس کے مطابق خصوصی مہم کے دوران رواں برس ہزاروں کی تعداد میں مختلف ہتھیار، گولیاں اور کارتوس برآمد کیے گئے۔ صوبہ بھر میں ملزمان کے قبضہ سے 993 کلاشنکوف، 2065 بندوقیں، 425 ریوالور بھی برآمد کیے گئے۔ ترجمان پنجاب پولیس نے بتایا کہ ملزمان سے 26 ہزار 617 پسٹل، 1921 رائفلز اور 01 لاکھ 76ہزار سے زائد گولیاں اور کارتوس برآمد ہوئے جبکہ صوبائی دارالحکومت میں ملزمان کے قبضے سے 102 کلاشنکوف، 217 بندوقیں، 41 ریوالور برآمد ہوئے۔ ترجمان پنجاب پولیس نے بتایا کہ لاہور میں 424 رائفلز ، 05 ہزار 685 پسٹلز اور 34 ہزار سے زائد گولیاں بھی ملزمان کے قبضے سے برآمد کی گئیں۔
آئی جی پنجاب نے کہا کہ سوشل میڈیا پر اسلحہ کی تشہیر اور ہوائی فائرنگ میں ملوث قانون شکنوں کو بھی قانون کی گرفت میں لایا جارہا ہے۔ آئی جی پنجاب نے ہدایت دی کہ اسلحہ کے کاروبار میں ملوث ڈیلرز کے لائسنس چیکنگ اور سٹاک کی انسپکشن کا عمل بھی باقاعدگی سے جاری رکھا جائے۔ آر پی اوز، ڈی پی اوز ناجائز اسلحہ کے خاتمے کیلئے جاری کریک ڈاؤن کی نگرانی خود کریں، ہفتہ وار رپورٹس سی پی او بھجوائیں۔
