اسلام آباد، 7 جون (اے پی پی):عیدالاضحی کے موقع پر ملک بھر میں سنت ابراہیمی کی پیروی کرتے ہوئے شہریوں نے قربانی کا فریضہ ادا کیا۔ عید کی نماز کے فوری بعد جانوروں کی قربانی کا سلسلہ شروع ہو گیا۔ شہریوں کی ایک بڑی تعداد نے قربانی کے لیے قصائیوں کی خدمات حاصل کیں، جبکہ کئی افراد نے خود اپنے جانور ذبح کیے۔
شہریوں نے گائے، بکرے، دنبے اور اونٹ کی قربانی دے کر اپنے مذہبی جذبات کا اظہار کیا۔ اس موقع پر قربانی کے بعد صفائی ستھرائی کے لیے انتظامیہ کی جانب سے خصوصی اقدامات کیے گئے۔
ضلعی انتظامیہ، میونسپل کارپوریشنز اور دیگر متعلقہ اداروں نے شہر کے مختلف علاقوں میں صفائی عملے کو متحرک کر دیا ہے۔ آلائشوں کو بروقت اور محفوظ طریقے سے ٹھکانے لگانے کے لیے بڑے پیمانے پر اقدامات کیے گئے ہیں۔ جگہ جگہ کوڑے کے تھیلے مفت تقسیم کیے گئے تاکہ شہری قربانی کے بعد صفائی کو ممکن بنا سکیں۔
انتظامیہ نے شہریوں سے اپیل کی ہے کہ وہ قربانی کے جانوروں کی آلائشوں کو مقررہ مقامات پر رکھیں، انہیں کھلے عام یا نالوں میں نہ پھینکیں، اور قربانی کے مقامات کو دھو کر صاف رکھیں تاکہ تعفن نہ پھیلے اور ماحول آلودہ نہ ہو۔
حکام کا کہنا ہے کہ سنت ابراہیمی کی ادائیگی کے ساتھ ساتھ صفائی کا خیال رکھنا بھی ہر شہری کی ذمہ داری ہے کیونکہ صفائی نصف ایمان ہے، اور اس کی اہمیت کو نظر انداز نہیں کیا جا سکتا۔ بدبو، گندگی اور جراثیم کے پھیلاؤ سے بچاؤ کے لیے ہر فرد کو تعاون کرنا ہو گا تاکہ صحت مند معاشرہ قائم رہ سکے۔
