واشنگٹن ڈی سی، 18 اکتوبر ( اے پی پی): وفاقی وزیر خزانہ سینیٹر محمد اورنگزیب نے اپنے سرکاری دورۂ امریکہ کے دوران انٹرنیشنل فنانس کارپوریشن کے مینیجنگ ڈائریکٹر مختار ڈیوپ سے اہم ملاقات کی، ملاقات میں پاکستان کے لیے آئی ایف سی کی پالیسیوں اور جاری منصوبوں پر تفصیلی تبادلہ خیال کیا گیا۔
وزیر خزانہ نے آئی ایف سی کی تنظیمِ نو کے بعد پاکستان کو علاقائی مرکز کا درجہ دینے پر ادارے کا شکریہ ادا کیا، اور اسے ملکی معیشت پر عالمی اعتماد کا اظہار قرار دیا۔ انہوں نے بتایا کہ یہ قدم نہ صرف سرمایہ کاری کے نئے مواقع پیدا کرے گا بلکہ بین الاقوامی مالیاتی اداروں کے ساتھ پاکستان کے روابط کو بھی مستحکم کرے گا۔
ملاقات کے دوران سینیٹر اورنگزیب نے ریکو ڈک منصوبے میں ہونے والی حالیہ پیش رفت سے بھی مختار ڈیوپ کو آگاہ کیا، اور امید ظاہر کی کہ ایگزِم بینک بھی جلد اس بڑے منصوبے کا حصہ بنے گا۔
وزیر خزانہ نے خاص طور پر آئی ایف سی کی ذیلی مالیاتی تعاون، ڈیجیٹل پیمنٹ رائٹس، اور مشاورتی خدمات کو سراہا، جن کا اطلاق دوا سازی، الیکٹرک گاڑیوں، اور کموڈیٹی ایکسچینجز جیسے ابھرتے ہوئے شعبوں میں ہو رہا ہے۔
اس موقع پر وزیر خزانہ اور مختار ڈیوپ نے اسٹیٹ بینک آف پاکستان اور آئی ایف سی کے درمیان سواپ ایگریمنٹ پر دستخط کی ایک اہم تقریب میں بھی شرکت کی، جو دونوں اداروں کے درمیان مالیاتی ہم آہنگی کو مزید فروغ دے گا۔وزیر خزانہ نے مختار ڈیوپ کو آئندہ بہار اجلاس کے موقع پر پاکستان کے دورے کی دعوت دی، جسے انہوں نے خوش دلی سے قبول کیا۔یہ ملاقات پاکستان اور آئی ایف سی کے درمیان بڑھتے ہوئے اعتماد اور مالی شراکت داری کی ایک اور روشن مثال ہے۔
