اسلام آباد، 9جنوری(اے پی پی): نجکاری کمیشن (پی سی )بورڈ نے آج وزیراعظم کے مشیر برائے نجکاری اور چیئرمین نجکاری کمیشن محمد علی کی زیر صدارت اپنے 247ویں اجلاس میں ہاؤس بلڈنگ فنانس کمپنی لمیٹڈ، روزویلٹ ہوٹل، نیو اسلام آباد انٹرنیشنل ایئرپورٹ اور پاور ڈسٹری بیوشن کمپنیز (DISCOs) بیچ ٹو کی نجکاری سے متعلق اہم فیصلے لیے۔
پی سی بورڈ نے روزویلٹ ہوٹل کی نجکاری کے لیے فنانشل ایڈوائزر کی خدمات حاصل کرنے کے عمل کو منسوخ کر دیا اور ہدایت کی کہ فنانشل ایڈوائزر کی تقرری کے لیے نئے اظہارِ دلچسپی (EOI) کو مدعو کیا جائے۔ یہ فیصلہ مزید مسابقتی عمل کو مزید مضبوط اور یقینی بنانے کے لیے لیا گیا، کیونکہ مقررہ معیار کے تحت قانونی اور تکنیکی تعمیل کی اسکریننگ کے بعد دلچسپی رکھنے والی جماعتوں کی تعداد سات سے کم ہو کر دو رہ گئی تھی ۔
بورڈ نے کابینہ کمیٹی برائے نجکاری کو اسلام آباد ائیر پورٹ کو نجکاری پروگرام میں شامل کرنے کی سفارش کی۔ یکم جنوری 2026 کو کابینہ کمیٹی برائے بین الحکومتی تجارتی لین دین (CCoIGCT) کی جانب سے جی ٹو جی موڈ کے تحت نجکاری کے امکان کو مسترد کیے جانے کے بعد پی سی بورڈ نے مسابقتی عمل کے تحت کنسیشن ماڈل کے ساتھ آگے بڑھنے کی سفارش کی ہے ۔
مزید برآں، کمیشن کو بورڈ کی طرف سے یہ اختیار دیا گیا ہے کہ وہ ایشیائی ترقیاتی بینک کے ساتھ فنانشل ایڈوائزری معاہدے کے لیے براہ راست بات چیت کرے۔
پی سی بورڈ نے حیسکو اور سیپکو کی نجکاری کے لیے ٹرانزیکشن کمیٹی کے قیام کی بھی منظوری دی۔ ٹرانزیکشن کمیٹی لین دین کے مالیاتی مشیر Raiffeisen Investment کی طرف سے جمع کرائے جانے والے ڈیلیوریبلز کا جائزہ لے گی۔
پی سی بورڈ نے قومی خزانے کے لیے بہترین نتائج حاصل کرنے کے لیے تمام لین دین کو منظم، مسابقتی اور شفاف عمل کے ذریعے کرنے کے اپنے عزم کا اعادہ کیا۔
