اسلام آباد 7 اگست(اے پی پی): صدر مملکت آصف علی زرداری سے سویڈن کے لیے پاکستان کے نامزد سفیر احمد امجد علی نے ایوانِ صدر میں اہم ملاقات کی، جس کا بنیادی مقصد پاکستان اور سویڈن کے درمیان تجارتی، معاشی اور سفارتی تعلقات کو مزید مضبوط بنانا تھا۔
ملاقات کے دوران صدر مملکت نے باہمی تجارتی حجم کو بڑھانے کے ساتھ ساتھ قابلِ تجدید توانائی، پائیدار ٹیکنالوجیز، انفارمیشن ٹیکنالوجی اور زراعت کے شعبوں میں تعاون کو وسعت دینے پر زور دیا۔
انہوں نے کہا کہ پاکستان سویڈن کو ایک اہم اقتصادی شراکت دار اور یورپی یونین نیز اقوامِ متحدہ کا فعال رکن مانتا ہے، جبکہ دونوں ممالک جمہوری اقدار، انسانی حقوق اور عالمی قواعد کی پاسداری پر یکساں موقف رکھتے ہیں۔
صدر آصف علی زرداری نے نامزد سفیر کو ہدایت کی کہ وہ دونوں ممالک کے درمیان تعلیمی تبادلوں، مشترکہ تحقیقی منصوبوں اور تکنیکی تربیت کو فروغ دیں اور سویڈن میں مقیم پاکستانی تارکینِ وطن سے قریبی اور فعال روابط قائم رکھیں۔
