اسلام آباد، 23 اکتوبر (اے پی پی ): وفاقی وزیر تجارت جام کمال خان نے کہا ہے کہ پاکستان اور مالدیپ کے درمیان تجارتی و اقتصادی تعلقات کو مزید مستحکم بنانے کے وسیع مواقع موجود ہیں، جبکہ دونوں ممالک کی چھ دہائیوں پر محیط دوستی کو مضبوط اقتصادی شراکت داری میں تبدیل کرنے کے لیے کاروباری روابط کا فروغ اہم ہے۔
پاکستان مالدیپ بزنس فورم کے اختتامی سیشن سے خطاب کرتے ہوئے انہوں نے کہا کہ پاکستان غذائی مصنوعات، پھلوں، زرعی اجناس، ادویہ سازی، طبی و جراحی آلات اور ٹیکسٹائل سمیت مختلف شعبوں میں مالدیپ کی ضروریات پوری کرنے کی صلاحیت رکھتا ہے۔ دونوں ممالک سیاحت، مہمان نوازی، انفارمیشن ٹیکنالوجی، ڈیجیٹل انفراسٹرکچر اور تخلیقی صنعتوں میں بھی باہمی تعاون کو فروغ دے سکتے ہیں۔
وفاقی وزیر نے کہا کہ مالدیپ کے سیاحتی شعبے کا تجربہ پاکستان میں سیاحت اور خدمات کے معیار کو بہتر بنانے میں معاون ثابت ہو سکتا ہے، جبکہ پاکستان کے تاریخی مقامات، قدیم تہذیبیں اور قدرتی مناظر سرمایہ کاری کے نئے مواقع فراہم کرتے ہیں۔ انہوں نے کاروباری برادری پر زور دیا کہ وہ مشترکہ منصوبوں، تجارتی وفود کے تبادلوں اور براہِ راست کاروباری روابط کے ذریعے دوطرفہ اقتصادی تعاون کو آگے بڑھائے۔
جام کمال خان نے کہا کہ حکومت کاروبار اور تجارت کے فروغ، برآمدات میں اضافے اور سرمایہ کاروں کو سہولتیں فراہم کرنے کے لیے اقدامات کر رہی ہے۔ انہوں نے مالدیپ کے سرمایہ کاروں کو پاکستان میں سرمایہ کاری اور پاکستانی صنعت کاروں کے ساتھ روابط بڑھانے کی دعوت دی، جبکہ مالدیپ کے وزیر تجارت اور تجارتی وفد کو پاکستان کی آئندہ بین الاقوامی فوڈ نمائش میں شرکت کی دعوت بھی دی۔
فورم کے اختتامی سیشن میں مالدیپ کے صدر ڈاکٹر محمد معیزو، وفاقی وزراء، اعلیٰ حکام اور دونوں ممالک کی کاروباری شخصیات نے شرکت کی۔ اختتامی کلمات میں شرکاء کی شرکت پر اظہارِ تشکر کرتے ہوئے کہا گیا کہ فورم کے دوران ہونے والی بات چیت اور کاروباری روابط دونوں ممالک کے تعلقات کو مزید مستحکم بنانے اور باہمی تعاون کے نئے مواقع پیدا کرنے میں معاون ثابت ہوں گے۔
