اسلام آباد،29 نومبر(اے پی پی ):پی اے ایف فنشنگ اسکول میں پرسنلٹی ڈیویلپمنٹ پروگرام کے47 ویں کورس کی گریجویشن تقریب جمعہ کو یہاں آفیسرز میس، پی اے ایف کمپلیکس میں منعقد ہوئی۔ معاون خصوصی برائے سماجی تحفظ و تخفیف غربت ڈاکٹر ثانیہ نشتر تقریب کی مہمان خصوصی تھیں۔ پاکستان ائیر فورس ویمن ایسوسی ایشن(پفوا) کی صدر اور پی اے ایف فنشنگ اسکول کی سرپرستِ اعلیٰ بیگم ائیر چیف مارشل مجاہد انور خا ن بھی اس موقع پر موجود تھیں۔ مہمان خصوصی نے گریجویٹ ہونے والی طالبات میں سرٹیفیکیٹس تقسیم کئے۔
اس موقع پر ڈاکٹر ثانیہ نشترنے پاکستان کے اس منفرد ادارے سے پرسنلٹی ڈیویلپمنٹ پروگرام کی کامیاب تکمیل پر طالبات کو مبارکباد پیش کی۔ انہوں نے معاشرے کی خواتین کی صلاحیتوں کو نکھارنے کے لئے ادارے کے تربیتی معیاراور فیکلٹی ارکان کی کوششوں کی تعریف کی اور کہا کہ اس ادارے سے حاصل کردہ تربیت طالبات کی پوری زندگی میں نکھار لائے گی اور انہیں قوم کی تعمیر میں اہم کردار ادا کرنے میں مدد فراہم کرے گی۔
قبل ازیں اسکول کی ڈائریکٹر زیبا شوکت نے کورس کی تفصیلات سے آگاہ کرتے ہوئے اِس کی نمایاں خصوصیات کو اجاگر کیا جنکا مقصد خواتین کو معاشرے کامفید ممبر بنانا ہے۔
1996ء میں قائم کردہ پی اے ایف فنشنگ اسکول ایشیاء میں اپنی طرز کا واحد ادارہ ہے جہاں خواتین کو مختلف تربیتی کورسز میں کمیونیکیشن سکلز، لینگویجز، منیجمنٹ، آرٹ آف پریزنٹیشن، ڈومیسٹک سائنسز، عمومی ثقافت، آداب میزبانی، بچوں کی دیکھ بھال، نفسیات، روحانی بالیدگی اور فیلڈ سروائیول کے لیکچرز کے علاوہ عملی تربیت بھی دی جاتی ہے۔ خواتین کی صلاحیتوں میں نکھارلانے اورملک میں تعلیم کے فروغ کے لئے قائم کیا جانے والا یہ ادارہ پاک فضائیہ کی ملکی تعمیر و ترقی میں کی جانے والی خدمات کے سلسلے کی ایک اہم کڑی ہے۔
سورس: وی این ایس، اسلام آباد
