اسلام آباد ،19 دسمبر (اے پی پی) :وزیراعظم عمران خان نے چیئرمین ایف بی آر کو بلڈرز اور کنسٹرکٹرز کے جائز مسائل ترجیحی بنیادوں پر حل کرنے کی ہدایت کرتے ہوئے کہا ہے کہ تعمیرات کے شعبے سے 40 کے لگ بھگ صنعتیں وابستہ ہیں، اس شعبے کے فروغ سے نوجوانوں کے لئے ملازمتوں کے بے شمار مواقع پیدا ہوں گے۔ وزیرِاعظم نے ہدایت کی کہ نیا پاکستان ہاوسنگ منصوبے کے لئے سرکاری زمینوں کو بروئے کار لانے کے عمل کو تیز کیا جائے۔
جمعرات کو حکومتی معاشی ٹیم کے اجلاس کی صدارت کرتے ہوئے وزیرِاعظم نے کہا کہ تعمیرات کے شعبے کے فروغ میں حائل رکاوٹوں کو دور کرنا حکومت کی اولین ترجیحات میں شامل ہے۔ اجلاس میں ملک کی مجموعی معاشی صورتحال، معاشی عمل کو تیز کرنے اور ہنرمندوں اور نوجوانوں کے لئے ملازمتوں کے مواقع پیدا کرنے کے لئے تعمیرات کے شعبے کے فروغ اور ترسیلات زر خصوصاً بیرون ملک پاکستانیوں کی جانب سے ملک بھیجی جانی والی رقوم پر مراعات پیکیج کے حوالے سے معاملات پر تفصیلی غور کیا گیا۔ ایگزیکٹو ڈائریکٹر این آئی ٹی بی سید شباہت علی شاہ نے الیکٹرنک ادائیگیوں کے ضمن میں ای پیمنٹ گیٹ وے کے قیام پر اب تک کی پیش رفت پرتفصیلی بریفنگ دی۔ چیئرمین نیا پاکستان ہاوسنگ اتھارٹی لیفٹیننٹ جنرل (ر) انور علی حیدر نے تعمیرات کے شعبے کے فروغ کے سلسلے میں کئے جانے والے اقدامات خصوصاً بلڈرز اور کنسٹرکٹرز کو درپیش مسائل سے اجلاس کو آگاہ کیا۔ چیئرمین نیا پاکستان ہاوسنگ اتھارٹی نے مختلف وزارتوں اور محکموں کی ملکیت میں موجود سرکاری املاک کو کم آمدنی والے افراد کے لئے گھروں کی تعمیر کے لئے بروئے کار لانے کے حوالے سے اب تک کی پیش رفت سے بھی اجلاس کو آگاہ کیا۔
سورس: وی این ایس اسلام آباد
