اسلام آباد، 7 جنوری (اے پی پی): وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے آرمی ایکٹ میں ترامیم کا بل قومی اسمبلی سے منظور ہونے پر تمام سیاسی جماعتوں کو خراج تحسین پیش کرتے ہوئے کہا ہے کہ ملکی تحفظ سے جڑی اہم قانون سازی پر سیاسی جماعتوں نے اتفاق اوربرد باری کا مظاہرہ کیا۔
منگل کو پارلیمنٹ ہاوس کے باہر پاکستان تحریک انصاف کے رہنماءفیصل جاوید کے ہمراہ میڈیا سے گفتگو میں انہوں نے کہا کہ آج ثابت ہو گیا کہ جب بھی ملک پر مشکل وقت آئے تمام سیاسی جماعتیں متحد ہو جاتی ہیں،سیاسی امور پر اختلاف رائے جمہوریت کا حسن ہے،جب بھی ملک کی قومی سلامتی اور مفاد کی بات آتی ہے تو سب سیاسی جماعتیں متحد ہو جاتی ہیں ۔
انہوں نے کہا کہ پیپلز پارٹی خصوصی تحسین کی حقدار ہے جس نے قومی مفاد میں اپنی تجاویز واپس لیں، مخالفین سن لیں ،ملکی مفاد کے معاملے میں تمام سیاسی جماعتیں متحد ہیں ، پارلیمنٹ عوام کی عدالت میں سرخرو ہوتی رہے گی۔
ڈاکٹرفردوس عاشق اعوان نے کہا کہ اداروں کے اندر سے کرپشن کا خاتمہ بھی قومی سلامتی کا اہم جزو ہے،کرپشن کے خاتمے کے لئے ایجنڈے کے مطابق ادارے اپنا کام کرتے رہیں گے۔
اس موقع پر پاکستان تحریک انصاف کے رہنماءفیصل جاوید خان نے کہا کہ خوش آئند بات ہے کہ اتفاق رائے سے بل پاس ہوا ، کچھ ایسی قانون سازی ہوتی ہے جس کو لمبا کھینچا جاتاہے ، زینب الرٹ بل کمیٹی میں پھنسا ہوا تھا جسے چار ماہ کے بعد پارلیمنٹ بھیجا گیا ہے۔
وی این ایس اسلام آباد
