واشنگٹن،17 جنوری(اے پی پی ): وزیرخارجہ شاہ محمود قریشی نے کہا ہے کہ پاکستان خطے میں قیام امن کے لئے اپنا مثبت کردار ادا کرنے کیلئے پر عزم ہے۔ صدر ڈونلڈ ٹرمپ اور وزیر اعظم عمران خان کےطویل المدتی اور وسیع بنیادوں پر استوار دو طرفہ تعلقات کے وژن کو سامنے رکھتے ہوئے ،دونوں ممالک کو زراعت ،تجارت اور سرمایہ کاری کے شعبوں میں دو طرفہ تعاون کو فروغ دینا ہو گا۔
کیپیٹل ہل میں سینئر ریپبلکن امریکی سینیٹر لنزے گراہم سے ملاقات کے دوران پاک -امریکہ دوطرفہ تعلقات اور خطے کی مجموعی صورتحال پر گفتگو کرتے ہوئے وزیر خارجہ نے پاکستان اور امریکہ کے مابین سٹرٹیجک شراکت داری کی تقویت و مضبوطی کے لئے حمایت پر سینیٹر لنزے گراہم کا شکریہ بھی ادا کیا ۔
وزیر خارجہ نے مشرق وسطی میں پائی جانے والی کشیدہ صورتحال پر قابو پانے کیلئے پاکستان کی طرف سے کی گئیں سفارتی کوششوں اور خطے کے مختلف ممالک کے وزرائے خارجہ سے ہونے والے روابط اور اپنے حالیہ دورہ ء ایران و سعودی عرب کی تفصیلات سے امریکی سینیٹر لنزے گراہم کو آگاہ کیا۔
وزیر خارجہ نے سینیٹر لنزے گراہم کو افغانستان میں” پرامن سیاسی تصفیہ” کے لئے جاری کوششوں میں پاکستان کی مصالحانہ کاوشوں سے بھی آگاہ کیا۔وزیر خارجہ نے اس امید کا اظہار کیا کہ جلد ہی” بین الافغان” مذاکرات کا آغاز ہو جاۓ گا۔ انہوں نے اس بات پر بھی زور دیا کہ فریقین کو متشدد رویوں میں کمی لانے کی ضرورت ہے۔
اس موقع پر سینیٹر لنزے گراہم نے مشرق وسطی میں کشیدگی میں کمی لانے اور افغانستان میں امن و مفاہمت کے عمل میں پاکستان کے مصالحانہ کردار کی تعریف کی اور کہا کہ پاکستان اور امریکہ کے درمیان پائیدار اور اعلی سطحی روابط دونوں ممالک کے باہمی مفاد میں ہیں۔
سینیٹر لنزے گراہم نے وزیر خارجہ مخدوم شاہ محمود قریشی کو یقین دلایا کہ وہ دونوں ممالک کے درمیان دو طرفہ تجارت اور زراعت کے شعبوں میں تعاون کے فروغ کیلئے اپنی حتی المقدور کوشش کریں گے۔ انہوں نے کہا کہ آزادانہ تجارت کا معاہدہ دونوں ممالک کے مابین تجارتی و اقتصادی تعاون کے فروغ میں معاون ہو گا اور اس معاہدے کے لئے میں ذاتی طور پر کوشاں رہوں گا۔
وی این ایس، واشنگٹن
