لاہور18،اپریل (اے پی پی):وزیراعلیٰ پنجاب سردار عثمان بزدارکی ہدایت پر کورونا وباء کی روک تھام کیلئے اقدامات کا جائزہ لینے کے لئے کابینہ کمیٹی کا ویڈیولنک اجلاس ہوا۔اجلاس میں متاثرہ مریضوں کے علاج معالجے کی سہولتوں کا جائزہ لیا گیا اور لاک ڈاؤن میں توسیع کے حوالے سے کئے جانے والے اقدامات پر بھی غورسمیت ڈاکٹروں، نرسوں اور پیرا میڈیکل سٹاف کیلئے حفاظتی کٹس کی دستیابی اور خریداری سے متعلقہ امور پر پیشرفت کا جائزہ لیا گیا۔
اجلاس کو بریفنگ کے دوران بتایا گیا کہ پنجاب میں گزشتہ 24 گھنٹے کے دوران کورونا کے 78 نئے کیس سامنے آئے ہیں، پنجاب میں اب تک کورونا سے متاثرہ مریضوں کی تعداد3465 ہے۔ گزشتہ 24 گھنٹے کے دوران پنجاب میں ایک متاثرہ مریض جاں بحق ہوا ہے –اجلاس کو بریفنگ کے دوران بتایا گیا کہ24 گھنٹے کے دوران تقریبا 3700 ٹیسٹ کئے گئے ہیں۔ اب تک تقریبا 53ہزار لوگوں کے ٹیسٹ کیےجا چکے ہیں –
اجلاس سے خطاب کرتے ہوئے صوبائی وزیر صحت ڈاکٹر یاسمین راشد نے کہا کہ پنجاب میں متاثرہ مریضوں کی دیکھ بھال احسن انداز سے کی جا رہی ہے ،بیرون ملک سے آنے والے مسافروں کو قرنطینہ میں رکھ کر ان کے ٹیسٹ کئے جائیں گےجبکہ سماجی فاصلہ رکھنے سے ہی کورونا سے محفوظ رہا جا سکتا ہے – ڈاکٹر یاسمین راشد نے کہا کہ پنجاب حکومت کے موثر اقدامات کے باعث قرنطینہ مراکز اور آئسو لیشن وارڈزبروقت قائم کئے گئے ہیں ۔
اجلاس میں گفتگو کرتے ہوئے صوبائی وزیر قانون راجہ بشارت نے کہا کہ ڈاکٹروں کے مسائل ترجیحی بنیادوں پر حل کئے جائیں گے، ڈاکٹروں کے ساتھ بات چیت مفید رہی ہے۔ ڈاکٹروں کو حفاظتی کٹس کی فراہمی یقینی بنائیں گے،ڈاکٹرز، نرسز اور پیرا میڈیکل سٹاف ہمارے فرنٹ لائن سولجر ہیں – انہوں نے کہا کہ ہیلتھ پروفیشنلز کی خدمات قابل تحسین ہیں –
اس موقع پر وزیرصنعت و تجارت میاں اسلم اقبال نے کہا کہ گندم خریداری مہم کے دوران سنٹرز پرسماجی فاصلے برقرار رکھنے کے لئے ایس او پیز پر عملدرآمد یقینی بنایا جائے گا- پنجاب میں تقریبا 15 فیصد گندم کی کٹائی ہوچکی ہے، باردانہ کی تقسیم کا عمل شفافیت کے ساتھ جاری ہے – انہوں نے کہا کہ اب تک پنجاب میں تقریبا 300 ایکسپورٹ انڈسٹریز کو کھولنے کی اجازت دی جا چکی ہے اوپن کی جانے والی انڈسٹریز کیلئے ایس او پیز پر عملدرآمد یقینی بنائیں گے۔
اجلاس میں صوبائی وزراء راجہ بشارت،میاں اسلم اقبال،ڈاکٹر یاسمین راشد سمیت چیف سیکرٹری، انسپکٹر جنرل پولیس، کمشنر لاہور ڈویژن،سیکرٹری خزانہ، سیکرٹری سپیشلائزڈہیلتھ کیئر اینڈ میڈیکل ایجوکیشن،سیکرٹری پرائمری اینڈ سکینڈری ہیلتھ کیئر، سیکرٹری اطلاعات، عسکری حکام او رمتعلقہ افسران سینئر ممبر بور ڈ آف ریونیو، ایڈیشنل چیف سیکرٹری داخلہ، چیف ایگزیکٹو آفیسر اربن یونٹ، سیکرٹری لوکل گورنمٹ اینڈ کمیونٹی ڈویلپمنٹ،ڈی جی پی ڈی ایم اے،سیکرٹری منصوبہ بندی وترقیات،سیکرٹری محنت، سیکرٹری انڈسٹریز،سیکرٹری فوڈ،سیکرٹری زراعت اور چیئرمین پنجاب انفارمیشن ٹیکنالوجی بورڈ نے ویڈیولنک کے ذریعے شرکت کی۔
اے پی پی /لاہور/قرۃالعین
