اسلام آباد، 05 مئی (اے پی پی ):ڈپٹی چیئرمین پلاننگ کمیشن جہانزیب خان کی زیر صدارت کنسیپٹ کلیئرنس کمیٹی کا اجلاس آج پلاننگ کمیشن میں منعقد ہوا جس میں ایشیائی ترقیاتی بینک کی کنٹری ڈائریکٹر مس شیاؤ ہنگ یانگ نے بھی شرکت کی،اجلاس میں کورونا وبا سے نمٹنے کیلئے ساڑھے تیس کروڑ ڈالر کی ایمر جنسی امداد کی منظوری دی گئی۔
ایشیائی ترقیاتی بینک پاکستان کو 20 کروڑ ڈالر غریب اور کمزور طبقات کے تحفظ کیلئے فراہم کرے گا جبکہ ساڑھے 10 کروڑ ڈالر ایمرجنسی اقدامات کی تیاری کیلئے فراہم کئے جائیں گے ۔ رقم وفاق کی طرف سے صوبوں اور خصوصی علاقہ جات میں NDRMF کے ذریعے گرانٹ کے طور پر دی جائے گی۔
اس موقع پر بات کرتے ہوئے ڈپٹی چئیرمین پلاننگ کمیشن جہانزیب خان کا کہنا تھا کہ کورونا وبا سے بلاواسطہ متاثر ہونے والے افراد کو ریلیف پہنچانے کیلئے کوشاں ہیں اور اس سکیم کے تحت ملک میں صحت کے متعلق اسٹاک کو بہتر بنانے میں مدد ملے گی، رقم حفاظتی لباس اور آلات کی فراہمی کیلئے استعمال کی جا سکے گی۔ موجودہ صحت کی سہولیات کو بہتر بنانے اور مزید صحت کے مراکز قائم کرنے، میڈیکل اسٹاف کی ٹریننگ اور صحت کے مونیٹرنگ کے نظام، صفائی ستھرائی اور پانی کی سہولیات کی فراہمی بھی اس عمل میں شامل ہو گی ۔
سورس: وی این ایس ، اسلام آباد
