نوشہرہ ورکاں،یکم دسمبر(اے پی پی): وزیر اعلی پنجاب عثمان بزدار کے حکم پر پنجاب بھر میں لگائے گئے سہولت بازار کامیابی سے چل رہے ہیں۔وزیر اعلی پنجاب کی انسپیکشن ٹیم نے خالد بسرا کی قیادت میں سہولت بازار تتلے عالی کا اچانک دورہ کیا اور سستے داموں اشیاء کی فراہمی کے لیے انتظامات اور چینی کے علاوہ آٹے کی سہولت بازار میں خریداری پر اطمینان کا اظہار کیا۔ اس موقع پر تحصیلدار خالد ھمایوں بھی موجود تھے۔
واضح رہے کہ ضلع گوجرانوالہ میں بشمول نوشہرہ ورکاں پانچ تحصیلوں اور گوجرانوالہ شہر میں چودہ سہولت بازار قائم کیے گئے ہیں، سہولت بازاروں کا مقصد معیاری اشیاء سستے داموں عوام کو فراہم کرنا ہے اور اس مقصد میں تجارتی حلقوں کا بھی تعاون شامل کیا گیا ہے۔
نوشہرہ ورکاں میں اسسٹنٹ کمشنر راشد اقبال، سی او کنور عثمان سیعد اور تحصیلدار خالد ھمایوں کی نگرانی میں سہولت بازارتحصیل آفس میں واقع لان میں لگایا گیا ہے اور تتلے عالی میں بھی سہولت بازار قائم اور کامیابی سے چل رہا ہے۔جہاں روز مرہ استعمال ھونے والی تمام اشیاء خوردونوش عوام کو سرکاری قیمت پر سستے داموں فراہم کرنے کے لیے رکھی گئی ہیں، جن میں چینی،سبزیاں، پھل، دالیں،آٹا، گھی،آئل،مشروبات ،چکن،بیف، انڈے ، مصالحہ جات اور دیگر سامان شامل ہے۔
