لاہور،26جنوری(اے پی پی):وزیراعلیٰ پنجاب سردار عثمان بزدار نے کہا ہے کہ تحریک انصاف کی حکومت نے سرمایہ کاری کے فروغ کیلئے انقلابی اقدامات کیے ہیں، ملکی و غیر ملکی سرمایہ کاروں کو ترجیحی بنیادوں پر ایک چھت تلے سہولتیں فراہم کی جارہی ہیں۔
ان خیالات کا اظہار وزیراعلیٰ پنجاب نے منگل کو یہاں سرمایہ کاروں کے وفد سے ملاقات کے دوران گفتگو کرتے ہوئے کیا،وفد نے پنجاب میں سرمایہ کاری پرگہرے دلچسپی کا اظہار کیا۔
سردار عثمان بزدار نے کہا کہ تعمیراتی شعبے کیلئے متعدد مراعات دی گئی ہیں اورسرمایہ کاروں کیلئے آسانیاں پیدا کی گئی ہیں۔انہوں نے کہا کہ کابینہ نے لاہور سینٹرل بزنس ڈسٹرکٹ ڈویلپمنٹ اتھارٹی کے قیام کی اصولی منظوری دے دی ہے۔اتھارٹی والٹن ائیرپورٹ اورگرد ونواح میں بزنس سرگرمیوں کو فروغ دینے کیلئے کام کرے گی۔
وزیر اعلی پنجاب نے کہا کہ اتھارٹی ملکی و غیر ملکی سرمایہ کاروں کو ترجیحی بنیادوں پر سہولتیں فراہم کرے گی۔پنجاب میں سرمایہ کاری سے متعلق کوئی فائل کسی بھی جگہ نہیں رکتی ۔ان کا کہنا تھا کہ صوبے میں سرمایہ کاری سے متعلقہ تمام امور کا خود جائزہ لیتا ہوں۔
اس موقع پر وفد نے کہا کہ پنجاب میں آپ کی حکومت نے سرمایہ کاری کے فروغ کیلئے بہترین اقدامات کیے ہیں۔ہم پنجاب میں سرمایہ کاری کیلئے آپ کے اقدامات کی ستائش کرتے ہیں۔
