اسلام آباد، 29مئی(اے پی پی):وفاقی وزیر داخلہ شیخ رشید احمد نے کہا ہے کہ صحافی اسد طور کے معاملے پر بعض لوگ ہماری حساس ترین ایجنسیوں کو بلاوجہ ملوث کرنا چاہتے ،ہمیں ایک اہم فوٹیج آج ملی ہے جس کے ذریعے مجھے یقین ہے کہ ہم جلد ملزمان تک پہنچ جائیں گے۔
ہفتہ کو جاری اپنے ایک ویڈیو پیغام میں وزیرخارجہ نے کہا کہ اس معاملے سے متعلق میری آئی جی اسلام آباد سے بھی بات ہوئی ہے اور میں ایف آئی اے کو بھی ہدایت کرتا ہوں کہ دونوں ادارے مل کر کام کریں اور اسد طور پر تشدد کرنے والے ملزمان کو جلد سے جلد قانون کے شکنجے میں لایا جائے۔
وفاقی وزیر داخلہ شیخ رشید احمد نے مزید کہا کہ وہ ایک روزہ دورے پر کویت جا رہے ہیں جہاں پر 2010 اور 2011 سے رکے ہوئے فیملی اور بزنس ویزہ کے اجراء کا فیصلہ ہو گا اور اس حوالے سے معاہدہ طے پائے گا۔انہوں نے کہا کہ میری کوشش ہو گی کہ میں مزدوروں کے معاملے پر بھی کویتی حکام کیساتھ کوئی معاہدہ طے کر سکوں۔
