لاہور،27 جولائی (اے پی پی): گورنر پنجاب چودھری محمد سرور سے ملاقات کے دوران چئیرمین ہائر ایجوکیشن کمشن ڈاکٹر فضل احمد نے گورنر کو سالانہ رپورٹ پیش کی اور گورنر کو بتایا کہ یونیورسٹی آف ہوم اکنامکس لاہور سمیت تین مختلف یونیورسٹیز میں سمارٹ کلاس بھی بنائی جارہی ہے۔
گورنرپنجاب کا گفتگو میں کہنا تھا کہ صوبہ پنجاب میں 15نئی یونیورسٹیز کے قیام پر کام کا آغاز ہوچکا ہے۔ 10 یونیورسٹیز کو صحت، زراعت، تعلیم و دیگر شعبوں میں ریسرچ کیلئے فنڈز بھی جاری کر دئیے گئے ہیں۔
علاوہ ازیں گورنر نے پنجاب ہائر کمیشن کے انوویشن اینڈ ریسرچ چیلنج پروگرام کو بھی سراہا اور کہا کہ یونیورسٹیز میں شفافیت اور میرٹ کو 100فیصد یقینی بنایا جارہا ہے، پنجاب ہائر ایجوکیشن کمیشن اعلی تعلیم کے فروغ کے لیے اہم کردار ادا کر رہا ہے، نئی یونیورسٹیوں کے قیام صوبے میں اعلیٰ تعلیم کے فروغ میں مدد ملے گی۔
انہوں نے کہا کہ کورونا کے دوران یونیورسٹیز کے وی سیز، رجسٹراراور فیکلٹی ممبرز کی آن لائن ٹریننگ قابل تحسین ہے، ایک سال میں یونیورسٹی کے 1565 فیکلٹی ممبرز کے لیے آن لائن سیشنز منعقد کیے گئے جو کہ لائق تحسین امر ہے۔
