اوکاڑہ،10اگست (اے پی پی): ڈپٹی ڈائریکٹر زراعت توسیع اوکاڑہ کے دفتر میں کسان کارڈ کے اجراءکے سلسلہ میں ایک پروقار تقریب کا انعقاد کیا گیا جس میں پاکستان تحریکِ انصاف کےٹکٹ ہولڈرچوہدری سلیم صادق نے گندم کے نمائشی پلاٹس لگانے والے زمینداران میں انعامی چیک تقسیم کئے۔اس موقع پر انہوں نے خطاب کرتے ہوئے کہا کہ آپ کی عوامی حکومت آپ کے مسائل حل کرنے اور زراعت میں جدت لانے میں کوئی دقیقہ فروگذاشت نہیں کرےگی۔
اس موقع پرچوہدری شہباز اختر ڈپٹی ڈائریکٹر زراعت توسیع اوکاڑہ نے زمینداروں کو کھاد و بیج پر فراہم کی جانے والی سبسڈی بارے پالیسی کو واضح کیا اورکسان کارڈ ایپلیکیشن اور اجراء کرنے کے میکانزم پر روشنی ڈالتے ہوئے بتایا کہ گندم کے نمائشی پلاٹس پر حکومت پنجاب کی طرف سے 11ہزار روپے فی پلاٹ ادائیگی گندم کی جدید پیداواری ٹیکنالوجی کے فروغ کا بہترین ذریعہ ثابت ہوئی۔
راؤ محمد ریاض انجم اسسٹنٹ ڈائریکٹر زراعت توسیع اوکاڑہ نے سرسبزتحریک بارےزمینداران کو آگاہی دی اور زمینداران میں مختلف اقسام کے پودے تقسیم کئے گئے۔تقریب میں ملک محسن رضا اور آصف گجر بھی موجود تھے
