کوئٹہ، 25 اگست (اے پی پی): وزیر اعلی بلوچستان جام کمال خان نے کہا ہے کہ دشمن ہمیں غیر مستحکم کرنا چاہتا ہے،صوبے میں امن وامان کی صورتحال پر کوئی سمجھوتہ نہیں کر سکتے،دہشت گردی کے خلاف ایک موثر بیانیہ تشکیل دینے کی ضرورت ہے۔
ان خیالا ت کا اظہار انہوں نے صوبے میں امن و امان کی صورتحال سے متعلق اعلیٰ سطحی اجلاس کی صدارت کرتے ہوئے کیا ۔ وزیر اعلی بلوچستان نے کہا کہ حکومت کا کام عوام کو تحفظ فراہم کرنا ہے اور گزشتہ سالوں میں صوبے میں سکیورٹی کی مجموعی صورتحال بہتر ہونے سے کاروباری سرگرمیوں کو فروغ ملا ہے۔
اجلاس کو ایڈیشنل چیف سیکرٹری داخلہ اور آئی جی پولیس بلوچستان کی جانب سے صوبے کی مجموعی سیکیورٹی صورتحال پر بریفنگ میں صوبے میں امن و امان کی صورتحال کو بہتر بنانے سے متعلق پلاننگ اور لائحہ عمل کے حوالے سے بھی بریفنگ دی گئی۔ اجلاس کو صوبے میں غیر ملکی شہریوں کو سیکیورٹی کی فراہمی اور شرپسندوں اور تخریب کار عناصر کے قلع قمع کے لئے اقدامات پر بریفنگ دی۔ آئی جی پولیس بلوچستان نے کہا کہ سیکیورٹی انتظامات کو مزید موثر بنانے کے لیے اقدامات کیے جا رہے ہیں۔
اجلاس میں صوبائی وزیر داخلہ میر ضیاءاللہ لانگو، چیف سیکرٹری بلوچستان، سیکریٹری خزانہ، سیکرٹری ایس اینڈ جی اے ڈی، وزیراعلیٰ کے پرنسپل سیکرٹری سیکرٹری اطلاعات، کمشنر کوئٹہ ڈویژن، ایڈیشنل سیکرٹری قانون، ڈی آئی جی سی ٹی ڈی اور ڈی آئی جی سپیشل برانچ سمیت دیگر متعلقہ حکام نے شرکت کی ۔
