خیرپور،29اگست(اے پی پی): تاجر برادری کی جانب سے ایس ایس پی ظفر اقبال ملک اور پولیس اہلکار جمیل احمد کلہوڑو کے اعزاز میں ایک تقریب کا انعقاد کیا گیا۔ ایس ایس پی کی آمد پر تاجر برادری کی جانب سے پرجوش استقبال کیا گیا ، پھولوں کے ہار پہنائے گئے اور سندھ کی ثقافتی ٹوپی اجرک اور شیلڈ کا تحفہ پیش کیا گیا۔ الشھباز انجمن تاجران کی جانب سے پولیس اہلکار جمیل احمد کلہوڑو کو بھی شیلڈ، سندھی ثقافتی ٹوپی اوراجرک کے تحائف دیئے گئے ۔
اس موقع پر ایس ایس پی نے کہا کہ ہمیں پولیس اہلکار پر فخر ہے جس نے ایک انسان کی جان بچا کر پوری انسانیت کو بچایا ہے۔انہوں نے کہا کہ تاجر برادری کے تحفظ کیلئے جامع سیکورٹی پلان تشکیل دیا گیا ہے جس کو مزید بہتر بنایا جائے گا ،خیرپور کے تاجروں نے دوران محرم الحرام پولیس کے ساتھ بہت تعاون کیا، تاجروں کے ساتھ درپیش مسائل ترجیحی بنیادوں پر حل کرینگے۔
انجمن تاجران کے عہدیداران نے ایس ایس پی ظفر اقبال ملک کی جانب سے ضلع خیرپور میں جرائم پیشہ افراد کے خلاف کی گئیں حالیہ کارروائیوں اور محرم الحرام کے دوران امن و امان کی فضا مستحکم رکھنے کیلیے اقدامات کو سراہا اور بھرپور تعاون اور حمایت کا اعلان کیا۔
الشھباز انجمن تاجران کے صدر اور عہدیداروں نے کہا کہ ایس ایس پی اور اس کی ٹیم کی جانب سے دن رات محنت کے نتیجے میں محرم الحرام امن وامان سے گذرا کیونکہ خیرپور ضلع محرم الحرام کے حوالے سے بہت حساس ہے۔ انجمن تاجران نے کہا کہ خیرپور پولیس امن کے قیام کے لئے عملی اقدامات کے ساتھ بہتر انداز میں کام کر رہی ہے ۔
یاد رہے کہ خیرپور پولیس کے اہلکار جمیل احمد نے ریلوے اسٹیشن میں محرم الحرام کے دوران ٹرین سے ایک شخص گرگیا تھا اس کو ٹرین کے نیچے آنے سے بچایا تھا۔
