ملتان، یکم ستمبر (اے پی پی ): ملتان ڈویژن میں 12ویں ریونیو عوامی خدمت کچہری کا انعقاد کیا گیا ہے ۔کمشنر ڈاکٹر ارشاد احمد نے عوامی ریونیو خدمت کچہری کا دورہ کیا اور شہریوں کی شکایات سنی اور حل بارے احکامات بھی جاری کئے ۔
کمشنر ڈاکٹر ارشاد احمد نے کہا کہ حکومت پنجاب کی ہدایت پر سرخ فیتہ کلچر کے خاتمے بارے عملی اقدامات کئے جارہے ،گزشتہ11 کچہریوں میں 13430 درخواستیں وصول، 13203 حل کی گئیں ہیں۔ کمشنر نے کہا کہ 76 درخواستیں عدالتی کیسز،دیگر قانونی پچیدگیوں کی وجہ سے زیر التواء ہیں جبکہ وزیراعلیٰ پنجاب کی اوپن ڈور پالیسی وژن کے تحت کام کر رہے ہیں ۔
انہوں نے کہا کہ عوام کی کچہری میں شرکت کو دیکھ کر بہت خوشی ہوئی ہے، کورونا ویکسینیشن کا سنٹر بھی ریونیو خدمت کچہری کے باہر قائم کردیا ہے جبکہ ریونیو معاملات و ریکوری افسران کا بنیادی کام ہے۔
کمشنر نے کہا کہ ریونیو افسران پورے دن کی سروس ڈیلوری رپورٹ ایڈیشنل کمشنر ریونیو کو جمع کروانے کے پابند ہیں۔
اس حوالے سے ڈی سی او عامر کریم خان نے کہا کہ عوام کیلئے فرد ملکیت اور وراثت کے حصول کا عمل سہل بنایا جارہا ہے ، لینڈ ریونیو و دیگر سرکاری واجبات کی ریکوری بہتر کی جارہی ہے ۔انہوں نے کہا کہ افسران عوامی خدمت کے جذبے سے سرشار ہوکر لوگوں کی فلاح و بہبود کے لیے کام کریں ۔
ایڈیشنل کمشنر طیب خان، اسسٹنٹ کمشنر خواجہ عمیر ، اسسٹنٹ کمشنر عدنان بدر،سب رجسٹرار جمیل حیدر ، کامران بخاری کچہری میں موجود تھے جبکہ تحصیلدار،قانونگو، پٹواری عملہ لینڈ ریکارڈ بھی موجود تھے ۔
