بہاولنگر ۔11ستمبر (اے پی پی):بہاولنگر ڈسٹرکٹ کوآرڈینیشن کمیٹی کا اجلاس ڈی سی آفس کے کمیٹی روم میں منعقد ہوا جس میں سینیٹر وچیف آرگنائزر پاکستان تحریک انصاف سیف اللہ سرورخان نیازی، سینیٹر عون عباس بپی کی خصوصی شرکت کی ،ممبر قومی اسمبلی میاں عبدالغفار کالوکا وٹو، صوبائی وزیر زکوٰۃ و عشر میاں شوکت علی لالیکا، انفارمیشن سیکرٹری پاکستان تحریک انصاف جنوبی پنجاب سہیل خان، ٹکٹ ہولڈر چوہدری عبد اللہ وینس، سید ندیم زمان شاہ، ملک مظفر، ممتاز مہاروی، میاں طارق عثمان گدوکا، کمشنر بہاول پور ڈویژن کیپٹن محمد ظفر اقبال، آر پی او محمد زبیر دریشک، ڈپٹی کمشنربہاول نگر شفقت اللہ مشتاق، ڈی پی اوبہاول نگر محمد ظفر بزدار اور تعمیراتی محکموں کے افسران موجود تھے۔سینیٹر وچیف آرگنائزرپاکستان تحریک انصاف سیف اللہ خان نیازی نے اجلاس سے خطاب کرتے ہوئے کہا کہ ترقیاتی منصوبے ترتیب دیتے وقت منتخب نمائندوں سے مشاورت کی جائے اور ترقیاتی سکیموں کو مقررہ مدت میں پایہ تکمیل تک پہنچانے کے لئے تمام تر اقدامات بروئے کار لائے جائیں۔سینیٹر عون عباس بپی نے اظہار خیال کرتے ہوئے کہا کہ تعمیراتی محکموں کے افسران حکومت کے ویژن کے مطابق کام کریں۔انہوں نے کہا کہ ترقیاتی سکیمیں جلد مکمل کی جائیں تاکہ عوام ان کے ثمرات سے مستفید ہو سکیں۔انہوں نے کہا کہ گراں فروشی کے خاتمہ کے لئے موثر اقدامات کئے جائیں تاکہ عوام ریلیف حاصل کر سکیں۔ اجلاس میں ضلع بھر کی ترقیاتی سکیموں، پرائس کنٹرول اور خدمت آپ کی دہلیز پر کے حوالہ سے کئے جانے والے اقدامات بارے بریفنگ دی گئی۔ ممبر قومی اسمبلی و چیئرمین ڈسٹرکٹ ڈویلپمنٹ کمیٹی میاں عبد الغفار کالوکا وٹو نے تعمیراتی محکموں کے افسران کو ہدایت کی کہ ترقیاتی سکیمیں اعلیٰ معیار کے ساتھ بروقت مکمل کی جائیں اور حکومت کے ویژن کے مطابق کام کیا جائے تاکہ لوگوں کو ریلیف حاصل ہو۔انہوں نے مزید کہا کہ تعمیراتی محکموں کے افسران فیلڈ میں جا کر ترقیاتی کاموں کا معائنہ کریں اور تمام ترقیاتی منصوبے اعلیٰ معیار کے ساتھ مکمل کئے جائیں۔
