اسلام آباد۔15ستمبر (اے پی پی):پاکستان سمیت دنیا بھر میں یوم جمہوریت بدھ کو منایا گیا۔ اس دن کی مناسبت سے ملک بھر میں سیاسی، سماجی اور عوامی تنظیموں نے مختلف تقاریب کا انعقاد کیا۔ اسلام آباد میں یوم جمہوریت کے سلسلہ میں پاک چائنہ فرینڈشپ سنٹر میں خصوصی تقریب منعقد ہوئی جس میں سپیکر قومی اسمبلی اسد قیصر، وفاقی وزیر منصوبہ بندی و ترقی اسد عمر، وفاقی وزیر اطلاعات و نشریات چوہدری فواد حسین، وفاقی وزیر تعلیم و پیشہ وارانہ تربیت شفقت محمود، وفاقی وزیر انسانی حقوق ڈاکٹر شیریں مزاری نے شرکت کی۔
اس موقع پر وفاقی وزیر اطلاعات و نشریات چوہدری فواد حسین نے کہا کہ عوامی طاقت سے جمہوریت مضبوط ہوتی ہے، جمہوریت میں اکثریت کی حکمرانی کے باوجود اقلیت کے حقوق کا تحفظ بھی ضروری ہے۔ جمہوریت کے 3 بنیادی ستونوں میں انسانی حقوق، قانون کی حکمرانی اور شراکت داری شامل ہیں۔ انہوں نے مزید کہا کہ موجودہ دور انفارمیشن کا ہے، جمہوریت اور انفارمیشن کا چولی دامن کا ساتھ ہے۔
