اسلام آباد، 01 نومبر (اے پی پی ): وزیراعظم عمران خان نے متعلقہ حکام کو ہدایت کی ہے کہ معاشرے کے پسماندہ طبقات کو معیاری رہائش کی سہولیات فراہم کرنے کے لیے تمام ضروری اقدامات کیے جائیں۔
ان خیالات کا اظہار وزیراعظم عمران خان نے پناہ گاہوں اور احساس کارڈز سے متعلق اجلاس کی صدارت کرتے ہوئے کیا۔ وزیر اعظم عمران خان نے کہا کہ ہم پناہ گاہ کو ایک مثالی سماجی بہبود کے منصوبے میں تبدیل کر رہے ہیں، جہاں غریب کو تمام شہری سہولیات مل سکیں۔ انہوں نے کہا کہ پناہ گاہوں میں خصوصاً موسم سرما کے دوران معیار زندگی کو بہتر بنانے کے لیے خصوصی انتظامات کیے جا رہے ہیں۔
وزیراعظم نے پناہ گاہوں میں مناسب حفظان صحت کے معیار اور صفائی کی بہتر سہولیات کو برقرار رکھنے کی بھی ہدایت کی۔
