اسلام آباد،16 نومبر(اے پی پی ): نئی دہلی میں پاکستانی ہائی کمیشن نے پاکستان میں 17 سے 26 نومبر تک بابا گرو نانک کے 552ویں جنم دن کی تقریبات میں شرکت کے لیے تقریباً 3 ہزار بھارتی سکھ یاتریوں کو ویزے جاری کر دیے۔
ہائی کمیشن سے جاری بیان میں کہا گیا کہ سکھ یاتری پاکستان میں اپنے قیام کے دوران ننکانہ صاحب میں گوردوارا جنم استھان اور کرتارپور میں گوردوارا دربار صاحب سمیت مختلف گوردواروں کی یاترا کیلئے جاسکیں گے۔سکھ یاتریوں کو یہ ویزے مذہبی مقامات کی یاترا کے لیے 1974 کے پاکستان ۔ بھارت پروٹوکولز کے تحت جاری کیے گئے ہیں۔
بھارت کے علاوہ دیگر ممالک میں مقیم ہزاروں سکھ یاتری بھی بابا گرو نانک کے جنم دن کی تقریبات میں شرکت کے لیے پاکستان آئیں گے۔ گوردوارا کرتارپور صاحب پاکستان کے عوام اور حکومت کی طرف سے بھارت اور دنیا بھر کی سکھ برادری کے لیے تحفہ ہے۔
ہائی کمیشن نے اس موقع پر پاکستان آنے والے یاتریوں کے لیے روحانی طور پر فائدہ مند یاترا کی خواہش کا بھی اظہار کیا۔
یاتریوں کے ویزوں کا زیادہ سے زیادہ تعداد میں اجرا پاکستان میں مذہبی مقامات کی یاترا کو فروغ دینے کے لیے حکومت کی کوششوں کے عین مطابق ہے۔
