چنیوٹ، 20 نومبر(اے پی پی ):آئی جی پنجاب کے وژن کے مطابق لوگوں کے مسائل انکی دہلیز پر سننے اور انکے حل کے لیے ڈسٹرکٹ پولیس آفیسر چنیوٹ کیپٹن(ر) بلال افتخار نے تھانہ بھوانہ میں کھلی کچہری کا انعقاد کیا۔ ڈی پی او نے کھلی کچہری کے دوران پیش ہونے والے لوگوں کے مسائل سن کر متعلقہ افسران کو درخواستیں مارک کیں۔
ڈی پی او نے کھلی کچہری کے دوران پیش ہونے والے لوگوں کو انصااف کی فراہمی کی یقین دہانی کرائی۔انہوں نے شکایات سیل افسران کو سختی سے ہدایت کی کہ لوگوں کی دادرسی یقینی بناکردرخواستوں کی فالواپ رپورٹ پیش کی جائے۔
ڈی پی او نے کھلی کچہری کے شرکاء سے خطاب کرتے ہوئے کہا ضلع چنیوٹ میں امن و امان کا قیام،بروقت انصاف کی فراہمی،لوگوں کے جان و مال کی حفاظت میری اولین ترجیح ہوگی۔موٹرسائیکل چوری،مویشی چوری،سٹریٹ کرائم و دیگر کرائم کی روک تھام کیلئے موثر حکمت عملی سے عملی اقدامات کیے جارہے ہیں۔انشاء اللہ چنیوٹ کے عوام امن وا مان کے حوالے سے بہتری دیکھیں گے۔انہوں نے کہا کہ کسی بھی شکایت کی صورت میں عوام الناس کو سب سے پہلے متعلقہ پولیس سٹیشن سے رجوع کرنا چاہیے اگر کسی بھی وجہ سے دادرسی نہ ہوسکے تو میرے دفتر کے دروازے کھلے ہیں،پولیس افسران کو جرائم پیشہ عناصر کی بیخ کنی کیلئے ہدایات جاری کردی گئی ہیں۔
ڈی پی او نے کھلی کچہری میں شرکت کرنے والے افراد کا شکریہ ادا کیا اور انکے مسائل کے حل کی یقین دہانی کروائی۔انہوں نے کہا کہ لوگوں کے مسائل انکی دہلیز پر سننے کیلئے ہر سرکل میں کھلی کچہریوں کا سلسلہ جاری رہے گا۔
کھلی کچہری میں ڈی ایس پی بھوانہ،ایس ایچ اوز بھوانہ،لنگرانہ،تفتیشی افسران،صحافیوں سمیت لوگوں کی بڑی تعداد نے شرکت کی۔
