اسلام آباد۔20جنوری (اے پی پی):وفاقی وزیر برائے توانائی حماد اظہر نے کہا ہے کہ پاکستان کی معیشت نے پچھلے سال 5.37 فی صد کی شرح سے ترقی کی ،یہ کامیابی تحریک انصاف حکومت نے اپنے تیسرے سال حاصل کی ،زرمبادلہ ذخائر میں اضافہ، گردشی قرضوں کے بہاؤ میں نمایاں کمی اور کرنٹ اکاؤنٹ خسارہ معمولی رہا،ن لیگ کی حکومت نے یہ شرح اپنے آخری سال میں حاصل کرنے کی خاطر ملک دیوالیہ کر دیا تھا۔ان خیالات کا اظہار انہوں نے جمعرات کو پریس کانفرنس سے خطاب کرتے ہوئے کیا۔ انہوں نے کہا کہ معاشی استحکام کیلئے حکومت نے مشکل فیصلے کئے،زر مبادلہ کے ذخائر،ترسیلات زر اور برآمدات میں ریکارڈ اضافہ ہوا۔انہوں نے کہا کہ پی ٹی آئی کی حکومت نے معیشت کو دیوالیہ ہونے سے بچایا،جب معیشت 5.37 فیصد سے ترقی کرے گی تو ہزاروں نوکریاں پیدا ہوں گی،معاشی استحکام کے حصول کیلئے حکومت کو غیر مقبول فیصلے کرنا پڑے۔انہوں نے کہا کہ آج ملکی معیشت کے حوالے سے اچھی خبرآئی ہے،گردشی قرضے میں سالانہ130 ارب روپے کمی ہو رہی ہے۔انہوں نے کہاکہ حکومت کو ملکی تاریخ کا ریکارڈ کرنٹ اکاؤنٹ خسارہ ملا ہے ۔انہوں نے کہا کہ صنعت میں 8۔7 اور خدمات کے شعبے میں 5فیصد اضافہ ہوا، کورونا کے باوجود معاشی استحکام کا ہدف حاصل کیا۔انہوں نے کہا کہ(ن) لیگ کسی کو اپنے اقتدار کے آخری سال کے قرضوں کا نہیں بتاتی، ہمیں ایک دیوالیہ معیشت ملی تھی۔انہوں نے کہا کہ عالمی سطح پر مہنگائی کا سیلاب آیا ہے، مہنگائی کا اثر پاکستان پر بھی پڑا، وفاقی وزیر حماد اظہر نے کہا کہ سابق حکومت سے کرنٹ اکاؤنٹ خسارے کی بیماری ملی،مڈل کلاس طبقے کو ریلیف دینے کیلئے اقدامات کیے جارہے ہیں، تنخواہ دارطبقے کو مشکلات کا سامنا ہے۔انہوں نے کہا کہ موجودہ حکومت کو ملکی تاریخ کا ریکارڈ کرنٹ اکاؤنٹ خسارہ ملا،کورونا وباکے باوجود حکومت نے معاشی استحکام کا ہدف حاصل کیا،حماد اظہر نے کہا کہ فیٹف گرے لسٹ اور دیگر معاشی مسائل ہمیں ماضی کی حکومت سے ملے،حکومت تنخواہ دارطبقے کو سہولیات فراہم کرے گی،حماد اظہر نے کہا کہ گردشی قرضے میں مسلسل کمی کیلئے اقدامات کیے جا رہے ہیں،پچھلے سال کے مقابلے میں ٹیکس محصولات میں 35 فیصد اضافہ ریکارڈکیا گیا۔انہوں نے کہا کہ لاہور دھماکے میں ملوث افراد کو کیفر کردار تک پہنچایا جائے گا، قانون نافذ کرنے والے ادارے دھماکے کی تحقیقات کر رہے ہیں۔انہوں نے کہا کہ کسی شر پسند کو ملک میں امن وامان خراب کرنے کی اجازت نہیں دیں گے۔انہوں نے کہا کہ آج بلومبرگ تجزیہ کررہا ہے کہ پاکستان کا اس دہائی میں گروتھ ریٹ پچھلی دہائی سے 30 فیصد تک زیادہ ہو گا جو اس بات کی نوید ہے کہ ہماری معیشت استحکام کیساتھ آگے بڑھ رہی ہے۔انہوں نے کہا کہ نون لیگ نےآخری سال جومعیشت چھوڑی اس سال 450 ارب کا گردشی قرضہ بڑھا،زر مبادلہ نصف ہوگیا، تمام ریٹنگز منفی ہوئی اورساتھ ہی کہا کہ جوحکومت آئے فوری آئی ایم ایف کے پاس جائے اُس دیوالیہ معیشت کوہم نےمستحکم کیا ۔
