پاکپتن،11 اکتوبر (اے پی پی):آئی جی پنجاب فیصل شاہکار نے پولیس مقابلے کے دوران شہید سب انسپکٹر سرور اکرم کو خراج تحسین پیش کیا ہے اور کہا ہے کہ ملزمان کو قرار واقعی سزا دلوائی جائے گی۔انہوں نے ڈی پی او پاکپتن سید توصیف حیدر کو اپنی نگرانی میں انکوائری کرنے کی ہدایت کی اور کہا کہ فائرنگ کرنے والے باقی ملزمان کو گرفتار کرکے قانون کے کٹہرے میں لایا جائے۔
اس حوالے سے ڈی پی او پاکپتن سید توصیف حیدر نے کہا ہے کہ سب انسپکٹر سرور اکرم شہید فرض کی راہ میں جام شہادت نوش کرگئے ہیں، پنجاب پولیس اپنے بہادر فرزند کی قربانی کو کبھی فراموش نہیں کرے گی۔انہوں نے کہا کہ شہید کی فیملی اور کم سن بیٹے کا بھرپور خیال رکھا جائے گا ۔
واضح رہے کہ انچارج چوکی فرید کوٹ پاکپتن سب انسپکٹر سرور اکرم گزشتہ رات اپنی ٹیم کے ہمراہ شہریوں کو لوٹنے والے ڈاکوؤں کا تعاقب کر رہے تھے کہ ضلع اوکاڑہ کی حدود میں کراس فائرنگ کے نتیجے میں جام شہادت نوش کر گئے۔ شہید سرور اکرم 20 اگست 2015 میں بطور سب انسپکٹر پولیس میں بھرتی ہوئے، سوگوران میں بیوہ اور ڈیڑھ سالہ بیٹا اذان شامل ہیں۔
