ملتان، 30 دسمبر (اے پی پی ): کمشنر اشفاق احمد چوہدری کی زیر صدارت جمعہ کو یہاں مردم شماری کے حوالے سے جائزہ اجلاس منعقد ہوا ۔کمشنر نے مردم شماری بارے فول پروف انتظامات کی ہدایات دیتے ہوئے کہا کہ ملکی تاریخ میں پہلی ڈجیٹل مردم شماری، ساتویں خانہ و مردم شماری کا آغاز ہورہا ہے، پہلی پیپر لیس مردم شماری میں جیوٹیگنگ شامل ہے۔ انہوں نے کہا کہ جدید دور میں ٹیکنالوجی کی کلیدی کردار سے انکار ممکن نہیں ، مردم شماری کو ملک کی منصوبہ بندی کیلئے اہم ذریعہ سمجھا جاتا ہے۔
کمشنر نے کہا کہ شمارکنندگان، جواب دہندگان کے درمیان تعاون کامیاب مردم شماری کیلئے ناگزیر ہے ۔انہوں نے کہا کہ شمار کنندگان قومی فریضہ سرانجام دے رہے ہیں جبکہ ملکی آبادی کی مستقبل کی ضروریات بارے مردم شماری کا کلیدی کردار ہے۔
ڈائیریکٹر لوکل گورنمنٹ ظہور شاہ نے کہا کہ ڈویژن میں 5559 شمار کنندگان، 873 سپروائزر مردم شماری میں ڈیوٹی سرانجام دیں گے ، ڈویژن بھر میں مردم شماری کیلئے 9975 بلاک بنائے گئے ہیں۔انہوں نے کہا کہ ملک بھر میں 7ویں خانہ و مردم شماری پر 34 ارب روپے لاگت آئے گی اور کہا ہر شہری پورٹل پر ڈجیٹل مردم شماری میں از خود اپنا ڈیٹا اپ لوڈ کر سکے گا۔
ایڈیشنل کمشنر سرفراز احمد، ایڈیشنل ڈپٹی کمشنر رضوان نذیر متعلقہ افسران موجود تھے۔
