ملتان، 19 مئی (اے پی پی): نشتر میڈیکل یونیورسٹی میں سٹوڈنٹس ویک کی رنگارنگ تقریبات کا آغاز ہو گیا ہے۔افتتاحی تقریب مصطفیٰ کمال پاشا لیکچر کمپلیکس میں منعقد ہوئی، تقریب کے مہمان خصوصی وائس چانسلر نشتر میڈیکل یونیورسٹی پروفیسر ڈاکٹر رانا الطاف احمد تھے، جنہوں نے سٹوڈنٹس ویک کا افتتاح کیا۔
اس موقع پر طلبہ انتہائی پرجوش نظر آئے اور تقریبات میں بڑھ چڑھ کر حصہ لینے کے عزم کا اظہار کرتے رہے۔ 18 سے 20 مئی تک جاری رہنے والی تقریبات میں مقابلہ حسن قرآت و نعت، مشاعرے، سپورٹس اور میوزک سمیت مختلف کلچرل شوز پیش کیے جائیں گے۔
وائس چانسلر نشتر میڈیکل یونیورسٹی پروفیسر ڈاکٹر رانا الطاف احمد کا افتتاحی تقریب کے موقع پر کہنا تھا کہ نصابی سرگرمیاں جہاں تعلیمی پہلوؤں کی تکمیل کے لیے ضروری سمجھی جاتی ہیں وہاں غیر نصابی سرگرمیوں سے طلبہ کواپنی فطری صلاحیتوں کے اظہار کا موقع ملتا ہے۔
افتتاحی تقریب میں پرنسپل نشتر میڈیکل کالج پروفیسر ڈاکٹر راشد قمر راؤ، ڈائریکٹر سٹوڈنٹس افیئرز پروفیسر ڈاکٹر محمد عباس نقوی، پروفیسر ڈاکٹر زہرا نازش اور پروفیسر ڈاکٹر اعظم خان سمیت طلباء وطالبات کی کثیر تعداد نے شرکت کی۔
