اسلام آباد،21مئی(اے پی پی):وزیرمملکت فیصل کریم کنڈی نے کہا ہے کہ وزیرخارجہ بلاول بھٹو زرداری نے پوری دنیا میں کشمیریوں کامقدمہ بہترین انداز میں پیش کیا ہے۔
اتوار کویہاں پریس کانفرنس کرتے ہوئے وزیرمملکت نے کہا کہ وزیرخارجہ کل مقبوضہ کشمیر کا دورہ کریں گے ، جہاں وہ مظفرآباد میں مختلف وفود سے ملاقاتیں کریں گے ، وہ قانون سازاسمبلی سے خطاب کریں گے، 23 تاریخ کو وہ جلسے سے خطاب کریں گے۔ انہوں نے کہا کہ بھارت نے سرینگرمیں جی 20گروپ کا اجلاس بلایا ہے، اس صورتحال کے تناظرمیں وزیرخارجہ کشمیرکی سرزمین پرکشمیریوں کامقدمہ لڑیں گے۔
وزیرمملکت فیصل کریم کنڈی کا کہنا تھا کہ ایس سی او کے بعد چین اورافغانستان کے وزرائے خارجہ کا دورہ، پاکستان کی سفارتی کامیابی ہے۔انہوں نےکہا کہ پی پی پی نے کشمیر میں پارلیمانی نظام دیا اورعدالتیں بھی قائم کیں،بی بی شہید نے حریت کانفرنس کواوآئی اسی کی رکنیت دی اورسلامتی کونسل کے اجلاس میں حریت کے وفد کومبصرکے طورپرلے کر گئے، پی پی پی نے ہمیشہ کشمیرکاز کیلئے کام کیا ہے۔
فیصل کریم کنڈی نے کہاکہ پرسوں پی پی پی کی سی ای سی کااجلاس ہوا، آصف علی زرداری اورچئیرمین بلاول بھٹو زرداری نے صدارت کی،اجلاس میں سیاسی صورتحال کاجائزہ لیاگیا اورمعاشی صورتحال پرگفتگو کی گئی ،اس کے علاوہ مردم شماری کے حوالے سے تحفظات کا جائزہ لیاگیا ، معیشت کی صورتحال پرتشویش کا اظہارکیا گیا اور فیصلہ کیا گیا کہ کابینہ کے اجلاس میں وزیراعظم کے سامنے یہ معاملات رکھے جائیں گے ۔
انہوں نے کہاکہ 9 مئی کے واقعات کی سب نے مخالفت کی ہے، پی پی نے کبھی بھی ریاست کے خلاف آواز یابندوق نہیں اٹھائی ، ہم نے آئینی ،قانونی اورجمہوری اصولوں کے مطابق جدوجہد کی ۔
وزیرمملکت فیصل کریم کنڈی کا کہنا تھا کہ جو کام پی ٹی آئی نے کیا وہی کام بی جے پی نے انڈیا میں کیاہے ، آج وہ امریکا کے پائوں میں پڑے ہیں، اگرعمران خان پارلیمان میں رہتے اور سیاسی جماعتوں کے ساتھ مذاکرات کرتے توانہیں آگے جانے کاراستہ ملتا مگر وہ کبھی ایک ادارے اورکبھی دوسرے ادارے سے مددمانگتے رہے ، آج کل وہ امریکا کے پائوں میں پڑے ہیں ، عمران خان کواس پراپنے کارکنوں سے معافی مانگنی چا ہیے اور کارکنان کو بتا دیں کہ ایبسلوٹلی ناٹ پر یوٹرن لے لیاہے۔انہوں نے کہا کہ عمران خان نے امریکی سازش سے امریکی غلامی تک کا سفرمکمل کرلیا ہے۔
فیصل کریم کنڈی نے کہاکہ عمران خان نے ہمیشہ پاکستان کی سفارتی کامیابیوں کوسبوتاژ کرنے کی کوشش کی ، بھارت میں مودی، امریکا میں ٹرمپ اورپاکستان میں عمران خان مسلط کردیا گیا جس سے نقصان ہوا۔ ان کا کہنا تھا کہ 9 مئی کے واقعات میں جوجولوگ ملوث ہیں انہیں قرارواقعی سزا دینی چاہیے۔انہوں نے کہا کہ پاکستانی عوام نے افواج کے ساتھ یکجہتی کا اظہارکیاہے۔
وزیر مملکت نے کہا کہ عمران خان محسن کش انسان ہے، ان کو بھی معاف نہیں کیاجنہوں نے انہیں اقتداردیا تھا۔ ایک سوال پرانہوں نے کہاکہ ہمارے پاس لوگ آنے کے لیے رابطے کررہے ہیں، جن جن لوگوں نے ریاستی تنصیبات پرحملہ کیاہے انہیں پارٹی میں شامل نہیں کریں گے۔ایک سوال پرانہوں نے کہاکہ پی پی پی آئین اورقانون کے مطابق پالیسی پرعمل پیرا رہے گی، لاہورہائیکورٹ کے فیصلے پرسپیکر لیگل ٹیم کے ساتھ مشاورت کے بعد فیصلہ کریں گے۔
