کوئٹہ،24 مئی(اے پی پی): کوئٹہ سے 150عازمین حج کو لیکرپاکستان انٹرنیشنل ایرلائن پی کے 1311حجاز مقدس روانہ ہوگئی۔کوئٹہ انٹرنیشنل ائیر پورٹ پر منعقدہ تقریب سے خطاب کرتے ہوئے پارلیمانی سیکرٹری مذہبی امور بلوچستان شاہینہ کاکڑ نے کہا کہ وفاقی حکومت کی خصوصی ہدایات کی روشنی میں بلوچستان کے عازمین حج کو ہر قسم کی سہولیات کی فراہمی کو یقینی بنانے کیلئے تمام وسائل کو بروئے لا رہی ہے۔انہوں نے کہا کہ بلوچستان کے یہ عازمین حج سعودی عرب میں پاکستان کے سفیر بن کر جارہے ہیں اور وہ اپنے ملک کا وقار اور نام کو بلند رکھے اور اپنے پیارے ملک پاکستان کی ترقی کے لئے خصوصی دعائیں کریں۔
پارلیمانی سیکریٹری مذہبی امور بلوچستان شاہینہ کاکڑ نے کہا کہ اس سال بلوچستان سے کل تقریباً 9 ہزار عازمین حج کی سعادت حاصل کریں گے،جسکے لئے 27 فلائٹ کوئٹہ سے کراچی اور پھر وہاں سے حجاز مقدس روانہ ہونگے۔
پہلی حج فلائٹ آپریشن تقریب میں ڈائرکٹر حج بلوچستان غلام الیاس جعفر ، سیکرٹری مذہبی امور ندیم الرحمن،مینیجر ائرپورٹ عبدل غفار میاں خیل ، صدر حج عمرہ ایسوسی ایشن سید ادو آغا نے شرکت کی۔
