گوجرانوالہ،23جون (اے پی پی): سائبر کرائم سرکل گوجرانوالہ نے بڑی کارروائی کے دوران”مسٹر سم” ماسٹر مائنڈ ملزمان کا بینک اکاونٹس سے آن لائن کروڑوں روپے نکلوانے والا گینگ گرفتار کر لیا ہے، ملزمان کورئیر کمپنی کے جعلی نمائندے بن کرمختلف شہریوں کو تحائف بھیجتے تھے۔بعدازاں تحائف وصولی کے نام پر دھوکہ دہی سے شہریوں کے انگوٹھے لگوا لیتے تھے،پھر ان انگوٹھوں کو پیپر سے سیلیکون تھمب میں تبدیل کر لیتے تھے،ملزمان سیلیکون تھمب کی مدد سے اکاؤنٹ ہولڈرز کی ڈوپلیکیٹ سم نکلوا لیتے اور مذکورہ سم کو استعمال کرتے ہوئے اکاؤنٹ ہولڈرز کی انٹرنیٹ بنکنگ ایکٹیو کرکے اکاؤنٹ سے ساری رقم نکلوا لیتے۔
گرفتار اکاؤنٹ ہولڈرز کی نشاندہی پر گینگ کے ماسٹر مائنڈ چوہدری جلیل الرحمان کو فیصل آباد سے گرفتار کر لیا گیا،تفتیش کے دوران ملزم چوہدری جلیل نے انکشاف کیا کہ انٹرنیٹ بنکنگ ایکٹیو کرنے کے لیے بینک ڈیٹا گینگ ممبر مہیا کرتا تھا۔ ملزم عاطف نذیر نجی بینک میں بطور برانچ مینیجر ڈیوٹی سرانجام دے رہا تھا۔ سائبر کرائم سرکل گوجرانوالہ نے دونوں ماسٹر مائنڈز کو گرفتار کر کے کارروائی کا آغاز کر دیا۔ مزید تفتیش جاری ہے اور بڑے انکشافات متوقع ہیں۔
