لاہور، 4اگست(اے پی پی): نگران وزیراعلیٰ پنجاب محسن نقوی کی زیر صدارت وزیراعلیٰ آفس میں منعقدہ اجلاس منعقد ہوا جس میں سروسز ہسپتال کی اپ گریڈیشن سے متعلق امور کا جائزہ لیا گیا۔ وزیراعلیٰ محسن نقوی نے سروسز ہسپتال کی اپ گریڈیشن کا ماسٹر پلان طلب کرتے ہوئے ہدایت کی کہ آئندہ 10 سے 20 برس کی ضروریات کو مدنظر رکھ کر سروسز ہسپتال کی ماسٹر پلاننگ کی جائے۔ انہوں نے کہا کہ سروسز ہسپتال کو پنجاب کا بہترین ہسپتال بنانا چاہتے ہیں۔ اجلاس میں ایڈمن بلاک کی جگہ میڈیکل ٹاوربنانے کی تجویز پر غور کیا گیا اور سروسزہسپتا ل کی چھتوں کو واٹر پرو ف کرنے کی ہدایت کی گئی۔ نگران وزیراعلیٰ محسن نقوی کو بریفنگ کے دوران بتایا گیا کہ سروسز ہسپتال میں 1460بیڈز، 1390 ڈاکٹر زاور 751 نرسز ہیں۔ بریفنگ میں بتایا گیا کہ سروسز ہسپتال کے سیوریج سسٹم اورالیکٹریفکیشن کا نظام ازسرنو لگایاجائے گا۔ نئے اے سی،بیڈز،بیڈشیٹس،پنکھے اوردیگرضروری سامان فراہم کیا جائے گا اورہسپتال کیلئے ضروری طبی آلات بھی مہیا کیے جائیں گے۔ بریفنگ میں مزید بتایا گیا کہ سروسز ہسپتال کے 42 واش رومز کو از سر نو تعمیر کیا جائے گا۔ صوبائی وزیر سپیشلائزڈ ہیلتھ کیئر اینڈمیڈیکل ایجوکیشن ڈاکٹر جاوید اکرم، سیکرٹری صحت، سیکرٹری ہاؤسنگ، سیکرٹری خزانہ، سیکرٹری تعمیرات و مواصلات، کمشنر لاہور ڈویژن، پرنسپل سروسز انسٹی ٹیوٹ آف میڈیکل سائنسز، ایم ایس سروسز ہسپتال اور متعلقہ حکام نے اجلاس میں شرکت کی۔
