اسلام آباد،28نومبر(اے پی پی): رواں سال کی آخری قومی انسداد پولیو مہم کے آخری مرحلہ کاآغاز پیر سے ہو چکا ہے، مہم کے دوران4 کروڑ 43 لاکھ 55 ہزار 341بچوں کو پولیو سے بچائو کے قطرے پلانے کاہدف مقرر کیاگیا ہے، مہم 3 دسمبر تک جاری رہے گی۔
مہم کا افتتاح وفاقی دارلحکومت کے ماڈل سکول کی ایک تقریب سے کیا گیا، جس میں وفاقی وزیر صحت ڈاکٹر ندیم جان نے پانچ سال سے کم عمر بچوں کو پولیو کے قطرے پلا کر مہم کا باضابطہ آغاز کیا۔
وفاقی وزیر صحت ڈاکٹر ندیم جان نے تقریب سے خطاب کرتے ہوئے بچوں کو باقاعدگی سے پولیو قطرے پلانے کے لیے والدین اور کمیونٹیز کے تعاون پر زور دیا۔
منگل کو وزارت صحت سے جاری بیان کے مطابق رواں سال کی آخری قومی انسداد پولیو مہم کا آخری فیز 27 نومبر سے 3 دسمبر تک چلے گا۔ پولیو مہم کا پہلا فیز13 تا 17 نومبرکو شمالی وزیرستان میں ہو چکا ہے۔ مہم کا دوسرا فیز 20 تا 24 نومبر جنوبی خیبرپختونخوا کے 6 اضلاع میں منعقد ہوا تھا۔
قومی انسداد پولیو مہم کا آخری فیز ملک بھر میں جاری ہے، جو 7 روز میں مکمل ہو گا۔تیسرے فیز میں پانچ روزہ پولیو مہم، دو کیچ اپ ڈیز ہیں۔ کیچ اپ ڈیز میں رہ جانے والے بچوں کی پولیو ویکسینیشن کی جائے گی۔
4 کروڑ 43 لاکھ 55 ہزار 341بچے قومی انسدادپولیو مہم کا ہدف ہیں ، پنجاب کے 36 ، خیبرپختونخوا کے 36،بلوچستان 36 اضلاع میں پولیو مہم منعقد ہو گی،سندھ کے 30 اضلاع، اسلام آباد میں قومی انسداد پولیو مہم چلے گی،آزادکشمیر 10 ،گلگت بلتستان 10 اضلاع میں قومی پولیو مہم ہو گی۔
پنجاب میں 2 کروڑ 25 لاکھ 65 ہزار 65بچوں کو پولیو ڈراپس پلائے جارہے ہیں۔ سندھ میں 1 کروڑ 29 لاکھ 5 ہزار 665بچوں کی پولیو ویکسینیشن ہورہی ہے۔خیبرپختونخوا میں 74 لاکھ 76 ہزار 456بچوں کو پولیوڈراپس پلائے جارہے ہیں۔بلوچستان میں 25 لاکھ 97 ہزار 735 بچوں کی پولیو ویکسینیشن ہورہی ہے۔ وفاقی دارالحکومت میں 421455 بچوں کی پولیو ویکسینیشن جاری ہے، آزادکشمیر میں سات لاکھ 20 ہزار 172 بچوں کی پولیو ویکسی نیشن ہورہی ہے۔
