پشاور، 24جنوری(اے پی پی): کور کمانڈر پشاور لیفٹیننٹ جنرل حسن اظہر نے پشاور صدر میں گزشتہ روز آگ سے متاثرہ کمرشل پلازہ کا دورہ کیا جہاں انہوں نے تاجروں اور دکانداروں سے ملاقات کی اور انکے مالی نقصان کا جائزہ لیا۔
کور کمانڈر پشاور لیفٹیننٹ جنرل حسن اظہر نے آتشزدگی کے سانحہ پر گہرے دکھ کا اظہار کیا اور میڈیا سے بات چیت کرتے ہوئے کہا کہ یہ واقعہ انتہائی افسوس ناک ہے البتہ اللہ کا شکر ہے کہ اس آگ لگنے کے باعث کوئی جانی نقصان نہیں ہوا لیکن متعدد دکانیں اور سٹالز کے خاکستر ہونے کے باعث تاجروں اور دکانداروں کا کافی نقصان ہوا جس پر ہم سب افسردہ ہیں۔
اس موقع پر چیف سیکرٹری خیبرپختونخوا ندیم اسلم چوہدری، کمشنر پشاور ڈویژن محمد زبیر اور ڈپٹی کمشنر آفاق وزیر بھی ان کے ہمراہ تھے۔
چیف سیکرٹری خیبرپختونخوا ندیم اسلم چوہدری نے کہا کہ نقصانات کی تفصیلات اکٹھی کی جا رہی ہیں اور واقعے کے حوالے سے رپورٹ کے آنے کا انتظار ہے۔انہوں نے اس بات پر اطمینان کا اظہار کیا کہ قریبی عمارتیں اس آگ سے محفوظ رہیں اور مزید نقصان نہیں پہنچا۔
چیف سیکرٹری نے اس موقع پر عمارتوں میں باہر نکلنے کے لئے ایمرجنسی راستے اور آگ بجھانے والے آلات نصب کرنے کو لازمی قرار دیتے ہوئے کہا کہ وہ اس حوالے سے پہلے ہی ہدایات دے چکے ہیں۔
