لاہور،24جنوری (اے پی پی):وزیراعلی پنجاب محسن نقوی نے قربان لائنز میں پنجاب سیف سٹی اتھارٹی کے ہیڈ آفس کا دورہ کیا۔وزیراعلی کی زیر صدارت امن وامان کی صورتحال سے متعلق اجلاس منعقد ہوا،جس میں عام انتخابات کے حوالے سے سکیورٹی انتظامات کا جائزہ لیا گیا۔
وزیر اعلی محسن نقوی نے عام انتخابات کے پرامن انعقاد کو یقینی بنانے کیلئے ضروری ہدایات دیتے ہوئے کہا کہ عام انتخابات کے پر امن انعقاد کے لئے تمام ضروری اقدامات کئے جائیں،عام انتخابات کا آزادانہ اور پر امن انعقاد یقینی بنانا قومی ذمہ داری ہے۔ محسن نقوی نے کہا کہ انسپکٹر جنرل پولیس کی قیادت میں پنجاب پولیس نے پہلے بھی ڈلیور کیا ہے اور اب بھی یہ قومی فریضہ بطریق احسن سرانجام دے گی۔
اجلاس میں فیصل آباد،گوجرانوالہ اور راولپنڈی کے سیف سٹی پراجیکٹس پر پیشرفت کا جائزہ لیا گیا۔ انہوں نے کہا کہ عوام کی جان و مال کے تحفظ کیلئے سیف سٹی پراجیکٹس انتہائی اہمیت رکھتے ہیں،منصوبے جلد از جلد مکمل کئے جائیں۔وزیراعلی نے قربان لائنز میں پولیس کی رہائش گاہوں کی تعمیر کے منصوبے پر ہونے والی پیشرفت کاجائزہ لیا۔
وزیر اعلی نے پولیس اپارٹمنٹس کا معائنہ کیا اور تعمیراتی کاموں میں اعلی معیار کو سراہا۔ انسپکٹر جنرل پولیس ڈاکٹر عثمان انور نے عام انتخابات کے لئے سکیورٹی انتظامات اور پولیس کی رہائش گاہوں کے منصوبے کے بارے میں بریفنگ دی۔
