کوئٹہ، 25 جنوری (اے پی پی):نگران وزیر اعلیٰ بلوچستان میر علی مردان خان ڈومکی کی زیر صدارت گودار ، اورماڑہ، پسنی اور جیونی سمیت نواحی علاقوں میں فراہمی آب سے متعلق اجلاس جمعرات کو منعقد ہوا ۔ اجلاس میں ضلع گوادر میں فراہمی آب سے متعلق جاری مختلف منصوبوں پر بریفنگ دی گئی اور پیش رفت کا جائزہ لیا گیا ۔
اجلاس سے خطاب کرتے ہوئے نگران وزیر اعلیٰ بلوچستان نے کہا کہ گوادر میں پینے کے صاف پانی کی فراہمی کو یقینی بنایا جائے گا، صاف پانی کی فراہمی سے متعلق عوام کو درپیش مسائل کا پائیدار حل تلاش کررہے ہیں ، بعض منصوبوں میں غیر ضروری تاخیر باعث تشویش ہے ۔
نگران وزیر اعلیٰ نے ہدایت کی کہ زیر التواءتمام منصوبوں پر کام بلا تاخیر شروع کیا جائے ، کیسکو اور کنٹریکٹر کے واجب الادا بلوں کی ادائیگی کرکے سروسز بحال کی جائیں جبکہ گودار اور گرد و نواح میں فراہمی آب کے زیر التواء منصوبے جلد پایہ تکمیل تک پہنچائے جائیں ۔
اجلاس میں نگران وزیر داخلہ میر زبیر خان جمالی ، چیف سیکرٹری بلوچستان شکیل قادر خان، پرنسپل سیکرٹری ٹو سی ایم راشد رزاق خان، کمشنر مکران ڈویژن سعید احمد عمرانی، ڈپٹی کمشنر میجر (ر) اورنگ زیب بادینی سمیت جی ڈی اے اور متعلقہ حکام نے شرکت کی ۔
