اسلام آباد ،15فروری( اے پی پی): وفاقی وزیر داخلہ ڈاکٹر گوہر اعجاز کی زیر صدارت اسلام آباد اور راولپنڈی میں پانی کی فراہمی اور صفائی کے حوالے سے اجلاس منعقد ہوا، جس دوران جڑواں شہروں میں پانی کی فراہمی، صفائی اور فضلہ کو ٹھکانے لگانے کے موجودہ نظام کا جائزہ لیا گیا۔
اجلاس میں اظہار خیال کرتے ہوئے وزیر داخلہ نے کہا کہ اس وقت 8000 صفائی کارکن ہیں ،جو 7 ارب روپے کے سالانہ بجٹ کے ساتھ روزانہ 2300 ٹن کچرے کو ٹھکانے لگاتے ہیں لیکن پھر بھی دونوں شہروں کے صفائی کو معیاری قرار نہیں دیا جا سکتا۔
وزیر داخلہ نے کہا کہ اس وقت جڑواں شہروں کو پانی کی 47 فیصد کمی کا سامنا ہے، پانی کی فراہمی اور صفائی بنیادی ضروریات ہیں ، ہم چاہتے ہیں کہ دارالحکومت دوسرے شہروں کیلئے روشن مثال بنے۔انہوں نے کہا کہ کل کی ضروریات کو پورا کرنے کیلئے ہیں آج فیصلہ سازی کرنی ہو گی اور اس مقصد کے لئے مربوط، جامع اور موثر نظام وضع کرنا ہو گا تاکہ عوام کو معیاری سہولیات فراہم کی جا سکیں، اس ضمن میں جلد از جلد تمام ضروری افدامات پر عملدرآمد کو یقینی بنایا جائے۔
اجلاس میں وزیر وفاقی وزیر اطلاعات مرتضی سولنگی بھی موجو د تھے ، انہوں کا کہنا تھا کہ بھل صفائی کو یقینی بنانا، پانی کی فراہمی کے نظام کی بہتری کے لیے ناگزیر ہے،زیر زمین پانی کی سطح میں بہتری پانی کی فراہمی میں انتہائی اہم ہے اس لئے اس جانب توجہ مرکوز کرنا ہو گی ۔انہوں نے کہا کہ اسلام آباد کے قدرتی نالوں کی صفائی کو بھی یقینی بنانا ہو گا۔
اجلاس میں چیف کمشنر اسلام آباد، لوکل گورنمنٹ ڈیپارٹمنٹ، آر ڈی اے اور کنٹونمنٹ بورڈ کے نمائندگان کی بھی شرکت کی ۔
