جوہرآباد،06 (اے پی پی):خوشاب پولیس کے زیراہتمام “نیور اگین” کے عنوان سے خواتین کے حقوق اور خواتین پر تشدد اب نہیں سے متعلق آگاہی واک کا توقیرمحمدنعیم،ڈی پی او خوشاب کی زیر نگرانی اہتمام کیا گیا ، ڈپٹی کمشنر خوشاب ذیشان شبیر رانا نے بطور مہمان خصوصی واک میں شرکت کی۔ واک کا آغاز ڈسٹرکٹ پولیس آفس خوشاب بمقام جوہرآباد سے ہوا اور ڈی پارک جوہرآباد میں اختتام پذیر ہوئی۔
ڈی پی او خوشاب توقیرمحمدنعیم نے کہا کہ خواتین کا کسی بھی معاشرے کی ترقی میں انتہائی اہم کردار ہے جیسے ایک گھر خاتون کے بغیر نہیں چل سکتا اسی طرح ایک معاشرہ ایک ملک بھی خواتین کے بغیر نہیں چل سکتا۔ خوشاب پولیس خواتین کے حقوق ان کے مسائل کے حل کے لیے اپنا بھرپور کردار ادا کرتی رہے گی۔ خواتین کی آسانی کے لیے تمام تھانوں میں وومن ہیلپ ڈیسک اور ضلعی سطح پر اینٹی وومن ہراسمنٹ سیل کام کر رہا ہے آپ کو کبھی بھی کوئی بھی شکایت گھر پر، کام کی جگہ پر یا کہیں بھی ہو آپ اس کو ضرور رپورٹ کریں ہم بروقت اور مکمل تحفظ فراہم کریں گے۔ خوشاب پولیس خواتین پر ظلم و تشدد کی روک تھام، حقوق کے تحفظ کے لئے پرعزم ہیں۔
ڈی سی خوشاب ذیشان شبیر رانا نے کہا کہ شہریوں میں شعور اجاگر کرنے کیلئے”نیور اگین” آگاہی واک، “خواتین پر تشدد اب نہیں کے عنوان سے منعقد کی گئی ہے۔ وزیر اعلیٰ پنجاب کے ویژن کے مطابق خواتین کا تحفظ اور صنفی جرائم کا خاتمہ خوشاب پولیس کی اولین ترجیح ہے، خوشاب پولیس اور ضلعی انتظامیہ خواتین سے متعلقہ ہر جرم پر زیرو ٹالرنس کے تحت سخت قانونی کارروائی پر کاربند ہے۔ ہم یہ یقینی بنائیں گے کہ ہماری مائیں ، بہنیں اور بیٹیاں مکمل محفوظ ماحول میں اپنی زندگیاں گزار سکیں۔
ڈپٹی کمشنر خوشاب ذیشان شبیر رانا، سوشل ویلفیئر آفیسر وومن پروٹیکشن سنٹر ام ایمن اور ڈی پی او خوشاب نے واک کے شرکاء سے خطاب کیا اور خواتین کے حقوق کو اجاگر کیا۔ تمام شعبہ ہائے نرسنگ، ایجوکیشن، وومن پروٹیکشن سنٹر اور پولیس سے تعلق رکھنے والی خواتین اور طالبات نے واک میں بھرپور شرکت کی۔
