نارووال، 25 مارچ (اے پی پی):وفاقی وزیر منصوبہ بندی وترقی پروفیسر احسن اقبال چودھری نے کہا ہے کہ ہمیں اپنی نئی نسل کے اندر مسلمانوں کے روشن ماضی کی طرح ایک دفع پھر سے تعلیمی فکر کو پیدا کرنا ہے ۔
ان خیالات کا اظہار انہوں نے پیر کو یہاں یونیورسٹی آف نارووال میں روڈز،سیوریج اور واٹر سپلائی سمیت مختلف آپریشنل فسیلٹیز پر مبنی سکیموں کے سنگ بنیاد رکھنے کی تقریب سے خطاب میں کیا۔انہوں نے کہا کہ وفاقی وزیر پروفیسر احسن اقبال چودھری کا کہنا تھا کہ یونیورسٹی آف نارووال کے ان منصوبوں کا سنگ بنیاد رکھنا میرے لئے خوشی کی بات ہے۔ جن منصوبوں کی منظوری ہمارے دور میں دی گئی وہ پچھلی حکومت کے دور میں بلاوجہ التوا ءکا شکار رہے۔میرے ساتھ منسوب تمام تر منصوبوں پر کام کو بلاوجہ روکا گیا۔ہم نے سینٹر آف ایکسی لینس کے لئے زمین کی خریداری کے لئے پچھلی پنجاب گورنمنٹ نے پیسے روک لئے اور پی۔ٹی۔آئی کی لوکل قیادت نے اس منصوبے کی تکمیل کو روک کر اپنی تعلیم دشمن سوچ اور انتقامی کارروائی کا منہ بولتا ثبوت دیا۔
وفاقی وزیر احسن اقبال نے کہا کہ ہم نے آپ بچوں کےلئے تعلیم کی تمام تر سہولیات مہیا کی ہیں اب آپ تعلیم کے میدان میں اپنا مقام خود پیدا کریں۔ٹیکنالوجی کے میدان میں اپنا نام پیدا کریں۔آئی۔ٹی کے استعمال سے دنیا بھر کی لائبریریوں سے اپنی تعلیمی ضروریات کو پورا کریں اور ریسرچ کی دنیا میں اپنا نام پیدا کریں۔اپنے اس وقت کا بھرپور استعمال کریں اور اپنی انٹلیکچول گروتھ پر دھان دیں۔صرف نوٹسز پر اکتفا کرنے سے آپ آج کی دنیا کا مقابلہ نہیں کرسکیں گے۔آج انوویشن کا زمانہ ہے آپ کو چاہیے کہ اپنے علم کو آپ گریڈ کرتے رہیں۔نئی نئی چیزیں سیکھیں اور اپنے آپ کو لائف لانگ لرنر کے طور پر تیار کریں۔
قبل ازیں یونیورسٹی آف نارووال پہنچنے پر وفاقی وزیر منصوبہ بندی وترقی پروفیسر احسن اقبال چودھری کا یونیورسٹی انتظامیہ کی جانب سے پرتپاک استقبال کیا گیا۔یونیورسٹی آف نارووال کی ٹیکنیکل ٹیم کی جانب سے پروفیسر احسن اقبال چودھری کو مذکورہ اسکیموں بارے تفصیلی بریفنگ دی گئی۔وفاقی وزیر پروفیسر احسن اقبال چودھری نے روڈ رولر چلا کر آپریشنل فسیلٹیز پر کام کا باقاعدہ افتتاح کیا اور یونیورسٹی آف نارووال کے ٹرانسپورٹ پول کیلئے خریدی جانے والی 4 بسیں یونیورسٹی انتظامیہ کے حوالے کیں اور ایڈمن بلاک میں پودا بھی لگایا۔
ممبر نیشنل اسمبلی چودھری انوار الحق،ممبر نیشنل اسمبلی وجیہ اکرم چودھری،صوبائی وزیر مذہبی و اقلیتی امور سردار رمیش سنگھ اروڑہ،ممبر صوبائی اسمبلی رانا منان اور سابق چئیرمین میونسپل کمیٹی نارووال سید اظہرالحسن گیلانی سمیت مختلف سیاسی و سماجی شخصیات نے بھی اس تقریب میں شریک تھے۔
