لاہور، 25 اپریل(اے پی پی): لاہور پولیس کی جانب سے پاکستان نیوزی لینڈ ٹی ٹونٹی کرکٹ سیریز کے پُرامن انعقاد کیلئے فول پروف سکیورٹی انتظامات مکمل کر لئے گئے۔ صوبائی دارالحکومت میں پاکستان اور نیوزی لینڈ کے مابین2 ٹی ٹونٹی میچز25اور27اپریل کو قذافی سٹیڈیم میں کھیلے جا رہے ہیں۔
اس حوالے سے سربراہ لاہور پولیس بلال صدیق کمیانہ نے کہا کہ 14ایس پیز،37ایس ڈی پی اوز،71ایس ایچ اوز اور448 اپر سبارڈنیٹس سمیت ساڑھے 05ہزار سے زائد پولیس اہلکار سکیورٹی ڈیوٹی کے فرائض انجام دیں گے۔ انہوں نے کہا کہ لاہورپولیس پاکستان نیوزی لینڈ ٹی ٹونٹی کرکٹ میچوں کے جامع سیکورٹی پلان پرعمل پیرا ہے۔ انھوں نے کہا کہ لاہور پولیس ملکی و غیرملکی کرکٹرزاور شائقین کوفول پروف سکیورٹی فراہم کر رہی ہے۔ پرامن اور محفوظ ماحول میں میچوں کا انعقادیقینی بنایا جائے گا۔
بلال صدیق کمیانہ نے کہا کہ پاکستان نیوزی لینڈ ٹی ٹونٹی کرکٹ میچوں کے دوران شہر بھر کی سکیورٹی ہائی الرٹ رہے گی۔انہوں نے کہا کہ کرکٹ سٹیڈیم، کھلاڑیوں کی رہائش اور روٹس کے سکیورٹی پلان پر اس کی روح کے مطابق عملدرآمد یقینی بنایا جائے گا۔سٹیڈیم میں داخلے سے قبل ہر فرد کی تلاشی اور خواتین شرکاء کی چیکنگ بذریعہ لیڈیز پولیس عمل میں لائی جائے گی۔
بلال صدیق کمیانہ کی میچوں کے دوران ٹریفک کی روانی کوبرقرار رکھنے کے لئے موثر اقدامات کی ہدایت دی۔ انھوں نے کہا کہ لاء اینڈآرڈر کی صورتحال کا جائزہ لینے کیلئے سیف سٹی اتھارٹی و دیگر کنٹرول رومز کے ذریعے موثر مانیٹرنگ یقینی بنائی جائے گی۔میچز کے دوران ڈولفن فورس، سپیشل پروٹیکشن یونٹ اور ایلیٹ فورس کی ٹیمیں موثر پٹرولنگ کریں گی۔انہوں نے کہا کہ شہری سکیورٹی پلان پر عملددرآمد کیلئے پولیس سے تعاون کریں۔
