اسلام آباد،29اپریل (اے پی پی):وفاقی وزیر داخلہ محسن نقوی نے کہا ہے کہ غیر قانونی طور پر جاری ہونےوالے کالے شیشوں کے تمام پرمٹ منسوخ کر رہے ہیں ، اسلام آباد ٹریفک پولیس آج سے ملک بھر کے کسی بھی حصے کے رہائشی کا اسلام آباد سے ڈرائیونگ لائسنس کا اجرا کرے گی جبکہ وفاقی دارالحکومت کے رہائشی 70 سال سے زائد عمر کے لوگوں کا لائسنس ان کے گھر جاکربنایا جائےگا۔
ان خیالات کا اظہار وفاقی وزیر نے آج ایف نائن پارک میں اسلام آباد ٹریفک پولیس کی جانب سے موبائل لائسنس و لرننگ وینز ، ٹریفک پولیس ایجوکیشن سروس کے اجراکے موقع پر صحافیوں سے گفتگوکرتے ہوئے کیا ۔ اس سے قبل وزیر داخلہ نے ٹریفک پولیس کی جانب سے شروع کی گئی دونوں سروسز کا باقاعدہ افتتاح کیا اور موبائل وین کا بھی معائنہ کیا۔ آئی جی اسلام آباد نے وفاقی وزیر داخلہ کو بریفنگ دی۔
وفاقی وزیر کا کہنا تھا کہ پاسپورٹ کے اجرامیں تاخیر کی مختلف وجوہات ہیں، پاسپورٹ اتھارٹی کے قیام کا حامی ہوں ، جلد وزارت داخلہ اس حوالے سے قانون سازی کے لئے ڈرافٹ سے متعلق وفاقی کابینہ کو آگاہ کرے گی۔
وزیر داخلہ محسن نقوی نے کہا کہ اسلام آباد کے شہریوں کو ہر ممکن سہولیات کی فراہمی میری اولین ترجیح ہے۔ آج ہم کالجز اور یونیورسٹیوں کے طلبا کو ان کی تعلیمی اداروں میں جا کر لرنر اور لائسنس کے اجرا اور تجدید کی سہولت فراہم کرنے کی سروس کا باقاعدہ آغاز کررہے ہیں۔ اس سروس کا مقصد طلبا و طالبات کا وقت ٹریفک دفتروں میں آنے جانے اور قطاروں میں لگ کر ضائع ہونے سے بچانا ہے۔ انہوں نے اعلان کیا کہ آج سے اسلام آباد ٹریفک پولیس 70 سے زائد بزرگوں کے گھر جا کر لائسنس بنائے گی۔
انہوں نے کہا کہ اسلام آباد میں ٹریفک جام کی صورتحال سے بھی آگاہ ہوں ، اس مسئلہ کو حل کرنے کے لئے کچھ منصوبے جلد شروع کرنے جا رہےہیں۔ انہوں نے کہا کہ اسلام آباد کو منشیات اور تجاوزات سے پاک کرنے کا کام شروع کر دیاگیا ہے۔ تجاوزات سے متعلق سپریم کورٹ کے فیصلہ پر بھی اسلام آباد میں من و عن عمل کریں گے۔ کسی کوبھی تجاوزات نہیں کرنے دیں گے۔
آئی جی اسلام آباد ناصر رضوی ، ایس ایس پی ٹریفک اور دیگر پولیس حکام اس موقع پر موجود تھے۔
