لاہور، 2 مئی ( اے پی پی ): وزیر خزانہ پنجاب مجتبی شجاع الرحمان نے کہا کہ کوئی بھی جمہوری حکومت عوام کی مشکلات میں اضافے کی حوصلہ افزائی نہیں کر سکتی ، ٹیکس دہندگان پر اضافی بوجھ کی بجائے نادہندگان کو ادائیگی پر آمادہ کیا جائے۔
ان خیالات کا اظہار انہوں نے وزراء کمیٹی برائے ریسورس موبلائزیشن 2024-25 کے پہلے اجلاس کی صدارت کرتے ہوئے کیا۔اجلاس میں صوبے کے ذاتی وسائل میں اضافے کے لیے ٹیکس ڈیپارٹمنٹس کی تجاویز کا جائزہ لیا گیا اورمحکمہ ایکسائز اینڈ ٹیکسیشن کی تجاویز پر غور کیا گیا۔
وزیر خزانہ پنجاب مجتبی شجاع الرحمان نے کہا کہ محصولات میں اضافے کے لیے وصولیوں کے میکانزم کو بہتر بنایا جائے ۔ انہوں نے کہا کہ عوام کو سہولیات کی فراہمی کے لیے صوبے کے ذاتی وسائل میں اضافہ ناگزیرہے ۔ شہریوں کو ٹیکس کی ضرورت اور اہمیت سے آگاہ کیا جائے ،ٹیکس وصولیوں کا مقصد عوام کے مسائل میں کمی لانا ہے ۔
وزیر خزانہ پنجاب نے کہا کہ سرکاری سکولوں میں معیاری تعلیم اور ہسپتالوں میں معیاری علاج کا انحصار ٹیکس دہندگان پر ہے۔ ٹیکس دہندگان گڈ گورننس میں حکومت کے سٹیک ہولڈرز ہیں۔انہوں نے کہا کہ شہری اپنا واجب الادا ٹیکس ادا کر کے اپنی زمہ داری پوری کریں ،حکومت تعلیم کے معیار اور صحت کی سہولیات میں بہتری لائے گی،محکمے نئے ٹیکس متعارف کروانے کی بجائے پہلے سے لاگو ٹیکس کی وصولیوں کو یقینی بنائے ۔
اجلاس میں صوبائی وزیر برائے کیمیونیکشن اینڈ ورکس صہیب احمد بھرتھ ،صوبائی وزیر برائے ٹرانسپورٹ بلال اکبر خان اور متعلقہ محکموں کے سیکرٹری صاحبان شریک تھے۔
