اسلام آباد، 07 جون (اے پی پی): صدر مملکت آصف علی زرداری نے جمعہ کو پرنس رحیم آغا خان کو پاکستان کیلئے خدمات کے اعتراف میں ’’نشانِ پاکستان‘‘ کا ایوارڈ عطا کر دیا۔
صدر مملکت نے یہ ایوارڈ پاکستان اور اس کی عوام کی ترقی اور فلاح میں ان کی شاندار خدمات کے قائدانہ کردار کے اعتراف میں دیا جس میں کمرشل بینکنگ، مائیکروفنانس، انشورنس، پائیدار سیاحت اور قابل تجدید توانائی کے شعبے شامل ہیں۔
تقریب کے بعد پرنس رحیم آغا خان نے صدر مملکت آصف علی زرداری سے ملاقات کی اور پاکستان کی سماجی و اقتصادی ترقی میں آغا خان ڈویلپمنٹ نیٹ ورک کے کردار پر تبادلہ خیال کیا گیا، ملاقات میں چیئرمین حبیب بینک لمیٹڈ سلطان علی الانہ اور اعلیٰ سرکاری افسران بھی میں شریک تھے۔
صدر مملکت کو پاکستانی عوام کی فلاح کیلئے مختلف شعبوں میں آغا خان نیٹ ورک کے کردار اور ترقیاتی منصوبوں کے بارے میں بتایا گیا، آغا خان ترقیاتی نیٹ ورک نے پاکستان میں تقریباً 5 کروڑ افراد کو مالیاتی خدمات تک رسائی بھی فراہم کی ہے۔
ایوان صدر میں منعقدہ خصوصی تقریب میں وزراء، اراکین پارلیمنٹ، سفارت کار اور سرکاری افسران بھی شریک تھے۔
صدر مملکت نے پاکستان آنے پر پرنس رحیم آغا خان کا شکریہ ادا کیا اور پاکستان کی سماجی و اقتصادی ترقی میں آغا خان خاندان کے کردار کو سراہا۔
