گوجرانوالہ،8جون(اے پی پی): صوبائی وزیر بلدیات میاں ذیشان رفیق نے گوجرانوالہ میں قربانی کے سیل پوائنٹس کا دورہ کیا۔ جس دوران عارضی مویشی منڈیوں میں پارکنگ، صفائی ستھرائی، سکیورٹی سمیت دیگر انتظامات کا جائزہ لیا ۔
وزیر بلدیات نے چن دا قلعہ اور کھیالی میں قائم عارضی مویشی منڈیوں کا معائنہ کیا۔ اس موقع پر صوبائی وزیر بلدیات نے کہا کہ منڈیوں میں شکایات کے ازالے کیلئے ٹھوس اور متحرک نظام ہونا چاہئیے،لائیوسٹاک کے کیمپس سے سپرے کے بغیر کوئی جانور شہر میں داخل نہ ہو،سیل پوائنٹس میں خرید و فروخت کے لئے آنے والے جانوروں کا مکمل ریکارڈ رکھا جائے اور پارکنگ کو منظم رکھیں تاکہ خریداروں کو دشواری نہ ہو۔ انہوں نے کہا کہ سیل پوائنٹس کے میڈیکل اور لائیو سٹاک کیمپس میں ادویات، ڈاکٹر موجود ہونے چاہئیں اورسخت گرمی میں منڈیوں میں پانی کی فراہمی پر خصوصی توجہ مرکوز رکھی جائے۔
میاں ذیشان رفیق نے کہا کہ منڈیوں میں صفائی اور پارکنگ کے انتظامات بہتر بناتے ہوئے سیل پوائنٹس پر بیوپاریوں اور جانوروں کو ہر ممکن سہولیات مہیا کریں، اس کے علاؤہ عید پر صفائی اور مویشی منڈیوں کے حوالے سے ہر شکایت کا فوری ازالہ کیا جائے۔انہوں نے کہا کہ وزیراعلیٰ پنجاب مریم نواز کی ہدایت پر قربانی کے جانوروں کی خریداری پر کوئی چارجز وصول نہ کئے جائیں۔
اس موقع پر کمشنر گوجرانوالہ ڈوثرن نوید حیدر شیرازی نے صوبائی وزیر کو بتایا کہ ضلع گوجرانوالہ میں 13 اور وزیر آباد میں 2 عارضی منڈیاں قائم کی گئیں ہے،منڈیوں میں آنے والے جانوروں پر سپرے کو سوفیصد یقینی بنایا جا رہا ہے اور جانوروں کا تمام ریکارڈ بھی مرتب کیا جا رہا ہے اور وزیر اعلیٰ پنجاب کی ہدایت پر عملدرآمد یقینی بنانے ہوئے مفت سہولیات فراہم کی جا رہی ہیں۔
اس موقع پر ڈپٹی کمشنر محمد طارق قریشی ،سلمان خالد بٹ ،اسسٹنٹ کمشنر صدر عثمان سکندر ،ڈائریکٹر لوکل گورنمنٹ ،سی او میٹرو پولیٹن کارپوریشن حیدر چٹھہ،سی او ضلع کونسل محمد خرم،اے ڈی ایل جی ذوالقرنین حیدر سمیت دیگر متعلقہ اداروں کے افسران بھی موجود تھے۔
اے پی پی /وصیدالزمان خاں/حامد
