راولپنڈی،30 اکتوبر(اے پی پی ): پاک بحریہ کی کمانڈ اینڈ اسٹاف کانفرنس نیول ہیڈ کوارٹرز اسلام آباد میں اختتام پذیر ہوگئی۔ کانفرنس کی صدارت ایڈمرل نوید اشرف، چیف آف دی نیول اسٹاف نے کی ہے۔
کانفرنس کے دوران چیف آف دی نیول اسٹاف نے میری ٹائم ڈومین میں روایتی اور غیر روایتی چیلنجز سے مؤثر طریقے سے نمٹنے کے لیے مستقل جنگی تیاریوں کو برقرار رکھنے کی اہمیت پر زور دیا۔ انہوں نے امن و استحکام اور علاقائی میری ٹائم سیکیورٹی میں پاک بحریہ کے کلیدی کردار کو مزید اجاگر کیا۔
ایڈمرل نے زور دے کر کہا کہ پاک بحریہ قومی خودمختاری کو برقرار رکھنے اور میری ٹائم سرحدوں کے ایک ایک انچ کے دفاع کو یقینی بنانے کے لیے پوری طرح تیار ہے۔ فورم نے آپریشنل تیاریوں، جاری اقدامات اور آنے والے واقعات کا بھی ایک جامع جائزہ لیا، بشمول پاکستان انٹرنیشنل میری ٹائم ایکسپو اینڈ کانفرنس کے انعقاد اور تیاریوں کا، جو پاکستان کی بحری صلاحیت کو ظاہر کرنے اور علاقائی تعاون کو فروغ دینے کے لیے ایک اہم پلیٹ فارم کے طور پر کام کرتا ہے۔
کمانڈ اینڈ سٹاف کانفرنس پاکستان نیوی کے اعلیٰ ترین فیصلہ ساز فورم کے طور پر کام کرتی ہے، جس میں چیف آف دی نیول سٹاف، پرنسپل سٹاف آفیسرز اور فیلڈ کمانڈرز تزویراتی ترجیحات پر غور و خوض کرتے ہیں، آپریشنل تیاریوں کا جائزہ لیتے ہیں اور بحری صلاحیتوں کو قومی سلامتی کے مقاصد سے ہم آہنگ کرنے کے لیے پالیسیاں مرتب کرتے ہیں
