اسلام آباد، 03 نومبر (اے پی پی): وفاقی وزیر برائے موسمیاتی تبدیلی و ماحولیاتی ہم آہنگی، سینیٹر ڈاکٹر مصدق ملک نے کلائمیٹ وَلنریبل فورم (CVF-20) کے وفد سے ملاقات کی، جس میں پاکستان کے مجوزہ کلائمیٹ پراسپرٹی پلان پر تبادلۂ خیال کیا گیا۔ یہ منصوبہ آئندہ ماحولیاتی کانفرنس (COP30) میں پیش کیا جائے گا۔
وفد نے وفاقی وزیر کو منصوبے کے بنیادی مقاصد سے آگاہ کیا، جو پاکستان کو ایک ماحولیاتی لحاظ سے مضبوط، کم کاربن اور جامع معیشت کی جانب منتقلی کا روڈ میپ فراہم کرتا ہے۔ ملاقات میں پاکستان میں جاری سبز ترقیاتی منصوبوں اور ماحولیاتی لچک پیدا کرنے کے اقدامات پر بھی تفصیلی گفتگو ہوئی۔
دونوں فریقوں نے سبز سرمایہ کاری کو فروغ دینے، جاری منصوبوں کی رفتار تیز کرنے، اور تکنیکی تعاون، جدت اور علم کے تبادلے کے ذریعے مشترکہ اہداف کے حصول پر اتفاق کیا۔
ڈاکٹر مصدق ملک اور سی وی ایف وفد نے آئندہ COP30 کے مذاکرات کے دوران پاکستان کی ماحولیاتی ترجیحات اور دیگر کمزور ممالک کے مفادات کو عالمی سطح پر مؤثر طور پر اجاگر کرنے کے لیے قریبی تعاون پر بھی اتفاق کیا۔
