اسلام آباد، 5مارچ(اے پی پی):انفارمیشن ٹیکنالوجی اور ٹیلی کمیونیکیشن کی وزیر شزہ فاطمہ خواجہ کا کہنا ہے کہ ملک میں انٹرنیٹ کنیکٹیویٹی کو بڑھانے کے لیے تین نئی سب میرین کیبلز بچھائی گئی ہیں۔ قومی اسمبلی میں وقفہ سوالات کے دوران ایک سوال کے جواب میں انہوں نے کہا کہ رابطے بڑھانے کے لیے موبائل ٹاورز کی فائبرائزیشن کے لیے اقدامات کیے جا رہے ہیں۔
وفاقی وزیر نے مزید کہا کہ چھ سو میگا ہرٹز سپیکٹرم کی نیلامی منگل کو ہوگی اور اس عمل کو شفافیت کو یقینی بنانے کے لیے براہ راست نشر کیا جائے گا۔ انہوں نے کہا کہ اس سے پاکستان میں انٹرنیٹ کی رفتار دوگنی ہو جائے گی۔ انہوں نے اس اعتماد کا اظہار کیا کہ اس سال کے آخر تک پانچ بڑے شہروں میں 5G خدمات دستیاب ہوں گی۔
شزہ فاطمہ خواجہ نے کہا کہ حکومت سائبر سکیورٹی کے تمام ممکنہ اقدامات کرے گی کیونکہ وہ ملک کی ڈیجیٹل حدود پر سمجھوتہ نہیں کر سکتی۔ انہوں نے کہا کہ ملک کی ڈیجیٹل حدود کو محفوظ بنانا پاکستان کی قومی سلامتی کا معاملہ ہے اور حکومت ان اقدامات کو اپ گریڈ کرنے کے لیے پرعزم ہے۔
ایک اور سوال کے جواب میں وزیر پارلیمانی امور طارق فضل چوہدری نے کہا کہ خصوصی سرمایہ کاری سہولت مرکز کے تحت اقدامات سے اربوں ڈالر کی سرمایہ کاری ہوئی ہے۔
توجہ دلاؤ نوٹس کا جواب دیتے ہوئے، پارلیمانی سیکرٹری برائے نیشنل ہیلتھ سروسز نیلسن عظیم نے ایوان کو بتایا کہ ڈرگ ریگولیٹری اتھارٹی آف پاکستان اس وقت ہیپاٹائٹس ڈیلٹا وائرس کے علاج کے لیے تیار کردہ ویکسین کی جانچ کر رہی ہے۔
انہوں نے مزید بتایا کہ HPV ویکسین نو سے چودہ سال کی عمر کی لڑکیوں کو لگائی جارہی ہے۔ انہوں نے مزید کہا کہ ایچ پی وی ویکسینیشن کی اہمیت کو اجاگر کرنے کے لیے ایک آگاہی مہم بھی چلائی جا رہی ہے۔
